Ministria ruse e mbrojtjes ka publikuar ditën e sotme pamje ku tregohet ministri i Mbrojtjes, Sergei Shoigu, duke vizituar një ekzibicion iranian të mbushur me raketa dhe dronë.
Sipas njoftimit thuhet se kjo vizitë është bërë në Teheran.
Moska po përpiqet të forcojë aleancat e saj me vende që nuk preferohen nga Perëndimi si Irani, i cili është akuzuar edhe më parë se ka furnizuar Moskën me armë ofensive që ka përdorur në Ukrainë.
Teherani i mohon akuzat.
Sergei Shoigu erdhi dje në Teheran ku foli me lavde për aleancën dhe bashkëpunimin ushtarak mes dy vendeve.
“E konsideroj këtë takim si një hap forcimi i partneritetit strategjik mes Rusisë dhe Iranit”, tha Shoigu gjatë takimit me kreun e forcave të armatosura të Iranit, Gjeneral Mohammad Bagheri.
“Sot ne kemi një mundësi për të diskutuar në detaje çështjet e bashkëpunimit tonë ushtarak bilateral. Irani është partner strategjik i Rusisë në Lindjen e Mesme,” citohej Shoigu nga agjencitë ruse.
Sipas tyre bisedimet përfshinin “zhvillimin e diplomacisë së mbrojtjes” dhe “menaxhimn e kërcënimeve të përbashkëta”, shkruante agjencia iraniane IRNA pa dhënë më shumë detaje.
Vizita e Shoigu vjen në kohën kur ministri i jashtëm kinez është në Moskë për katër ditë, si dhe pasi lideri koreano-verior Kim Jong Un erdhi në Rusi me tren duke kaluar përmes Lindjes së Largët.
© SYRI.net