Pekin - Qasja në mineralet e rralla të tokës dhe lufta e Rusisë kundër Ukrainës ishin në krye të axhendës në vizitën historike të presidentit francez Emmanuel Macron në Mongoli.

Macron u takua me homologun e tij mongol Ukhnaagiin Khurelsukh të dielën në kryeqytetin Ulaanbaatar dhe u zotua për bashkëpunim në nxjerrjen dhe tregtimin e mineraleve të përdorura në satelitë, telefona celularë dhe teknologji të tjera kryesore.

Vizita ishte e para nga një kryetar shteti francez në Mongoli, një demokraci pa dalje në det prej 3 milionë banorësh dy herë më e madhe se Teksasi, e vendosur mes Rusisë dhe Kinës.

Livadhet, malet dhe shkretëtirat e Mongolisë mbajnë depozita të mëdha qymyri, bakri dhe minerale më pak të njohura, jetike për ekonominë moderne.

Udhëtimi i Macron pasoi pjesëmarrjen e tij në samitin e Grupit të Shtatë në Japoni, ku pushtimi rus i Ukrainës ishte një temë kryesore.

Konflikti ka një ndikim global, tha Macron, duke iu referuar çmimeve të larta të ushqimeve dhe më shumë refugjatëve. Më shumë se 8 milionë ukrainas janë detyruar të largohen nga shtëpitë e tyre, sipas Kombeve të Bashkuara.

“Një kthim në paqe në kontinentin evropian në përputhje me ligjin ndërkombëtar”, është objektivi përfundimtar, tha Macron. “Kam qenë në gjendje të ndaj me Presidentin vullnetin tonë për të mbështetur një shtet që është nën agresion”.