Frikë nga vdekja? Presidenti i Bjellorusisë Aleksander Lukashenko ka urdhëruar të zëvendësojë të gjithë kuzhinierët, njerëzit e shërbimit dhe truprojat e tij pas vdekjes së papritur të ministrit të Jashtëm të Bjellorusisë, Vladimir Makei, sipas faqes Tpyxa News në Twitter, e cila transmeton lajme nga Bjellorusia, Ukraina dhe Rusia.

Leonid Nevzlin, një oligark ruso-izraelit dhe kritik i Putinit, deklaroi se Makei u helmua nga një operacion special i FSB-së ruse.

Nevzlin citoi burime “të afërta me shërbimet sekrete ruse” se vdekja e shkaktuar nga helmimi shkakton një pamje klinike të pajtueshme me një atak në zemër ose goditje në tru.

Ministri bjellorus do të merrte pjesë në një takim të OSBE-së këtë javë në Poloni, ku ishte planifikuar një takim me politikanët perëndimorë.

Vdekja e Makei, njeriu i dytë më i rëndësishëm në vend, ka futur në panik qeverinë bjelloruse. Dhe Lukashenko duket se është shok. Për këtë arsye duket se erdhi edhe vendimi për të zëvendësuar të gjithë kuzhinierët, shërbëtorët dhe truprojat e tij.

Alexander Lukashenko ka frikë se Vladimir Putin po përgatit një funeral “madhështor” për të dhe presioni mbi Bjellorusinë po rritet për t’u bashkuar në mënyrë aktive luftës kundër Ukrainës.

Sergei Markov, një analist pro-rus, tha gjithashtu se kuzhinierët dhe shërbëtorët në rezidencën e Lukashenkos ishin zëvendësuar, por shtoi se autoritetet bjelloruse hodhën poshtë teorinë se Makei ishte helmuar.

Para protestave antiqeveritare të vitit 2020, Makei ishte një nga figurat kryesore në favor të përmirësimit të marrëdhënieve të Bjellorusisë me Perëndimin i cili kritikoi Rusinë.

Makei ndryshoi mendje pasi filluan protestat dhe pretendoi se ato ishin organizuar nga agjentë perëndimorë.