Gjykata e Lartë e Mbretërisë së Bashkuar ka vendosur se parlamenti i Skocisë nuk e ka kompetencën legjislative për të mbajtur një referendum konsultativ për pavarësinë vitin e ardhshëm.

Vendimi u dha të mërkurën në mëngjes, pas një padie të ngritur nga qeveria skoceze dhe Partia Kombëtare Skoceze e Nicola Sturgeon në tetor.

Ministrja e parë Sturgeon, duke reaguar ndaj vendimit, tha se ishte e zhgënjyer.

“Demokracia skoceze nuk do të mohohet”, shkroi ajo në Twitter. “Vendimi i sotëm bllokon një rrugë për të dëgjuar zërin e Skocisë për pavarësinë – por në një demokraci, zëri ynë nuk mund dhe nuk do të heshtë.”

Sturgeon planifikoi të mbante një referendum të ri për pavarësinë në tetor të vitit të ardhshëm, por qeveria e Mbretërisë së Bashkuar ishte e bindur se nuk do të ndodhte, duke thënë se referendumi i vitit 2014 - i cili u fitua nga fushata "për jo" me 55% të votave, kundër 44% në favor të pavarësisë -- ishte një "ngjarje një herë në brez".

Që atëherë, shifrat janë afruar jdhe skocezët janë ndarë në mënyrë të barabartë për pavarësinë, megjithëse ata kanë kthyer vazhdimisht politikanët pro-pavarësisë në parlamentet në Westminster dhe Edinburg gjatë tetë viteve të fundit, me SNP-në që ka fituar çdo votë kombëtare që atëherë.