BILD

Dy divanë lëkure të bardhë, një tavolinë e rëndë druri me flamurin amerikan. Një pjesë e madhe e kësaj dhome të kujton Zyrën Ovale të presidentit të 41-të të SHBA.

Dhe kjo nuk është rastësi, sepse kjo Zyrë Ovale është shpirti i aeroplanmbajtëses ‘USS George HW Bush’. Kjo kështjellë lundruese mban emrin e ish-presidentit amerikan. Prandaj kabina e kapitenit është mobiluar në të njëjtën mënyrë si ish-Zyra Ovale e tij.

Nga Adriatiku, amerikanët tani po mbrojnë Europën në një mision të NATO-s. Manovra quhet ‘Goditja e Neptunit- mburoja jonë kundër rusëve’!

Avionët luftarakë F-18 ngrihen dhe ulen çdo minutë. Amerikanët e quajnë ‘Tingulli i lirisë’ bubullimën shurdhuese të avionëve luftarakë.

Admirali Dennis Velez thotë për BILD: “Kjo është situata më kërcënuese në Europë që nga Lufta e Dytë Botërore. Ne e marrim atë shumë seriozisht dhe po monitorojmë nga afër çfarë po ndodh në Ukrainë. Në fund të fundit, bëhet fjalë për mbrojtjen e territorit të NATO-s. Dhe e kam fjalën pikërisht ashtu siç po e them”.

‘Goditja e Neptunit’ është një shfaqje force përkundrejt Vladimir Putinit, i cili kërcënon vazhdimisht se do të sulmojë Ukrainën me armë bërthamore. Dhe teston gjithmonë e më shumë kufijtë e NATO-s.

Në bord të gjithë janë të qetë, nuk dëgjon fjalë agresive. Në vend të kësaj, NATO flet diplomatikisht për parandalimin dhe mbrojtjen dhe dëshiron që të shmangë çdo keqkuptim me rusët me çdo kusht. Vetë prania e “Bushit” është një kërcënim i mjaftueshëm. Sepse nga këtu, 80 avionë F-18 mund të arrijnë në çdo cep të krahut lindor të NATO-s. Një paralajmërim i pagabueshëm.

“Nuk mund të them nëse Putini e kupton këtë gjuhë,” thotë kapiteni Dave Pollard për BILD. “Por misioni ynë është paqja. Kjo është arsyeja pse ne jemi këtu. Dhe sa më shumë të stërvitemi me partnerët tanë të aleancës, aq më shumë jemi të përgatitur në rast emergjence”.

Askush nuk e dëshiron këtë gjë. Por “marina amerikane është gjithmonë e gatshme për të luftuar,” thotë admirali Velez. “Ne jemi të fortë me partnerët tanë të aleancës. Ne jemi një komunitet prej 30 shtetesh, ku të gjithë duan të jetojnë në paqe”.

“Freedom at work”, thuhet këtu në aeroplanmbajtësen ‘Bush’. Dhe në Zyrën Ovale lundruese.