Trupi i një vajze 16-vjeçare, e cila u zhduk gjatë protestave të fundit në Iran, u hoq nga një morg dhe u varros fshehurazi në një fshat të dielën.
Nika Shakarami u zhduk ndërsa protestonte për vdekjen e 22-vjeçares Mahsa Amini, e cila vdiq në qendrat e paraburgimit pasi u ndalua nga policia iraniane se nuk mbante shami, më 16 shtator.
Në mesazhin fundit për një mik ajo tha se po ndiqej nga forcat e sigurisë.
Familja e Nikës pas shumë kërkimesh e gjeti trupin e saj në një morg në një qendër paraburgimi në kryeqytetin iranian.
“Kur shkuam për ta identifikuar, nuk na lejuan ta shihnim trupin e saj, vetëm fytyrën për disa sekonda”, tha Atash Shakarami, tezja e Nikës për BBC.
Familja e Nikas e transferoi trupin e saj në vendlindjen e babait të saj, Khorramabad në perëndim të vendit të dielën - në atë që do të ishte ditëlindja e saj e 17-të.
Nën presion, familja ra dakord të mos zhvillonte një funeral, por forcat e sigurisë "vodhën" trupin e Nikës nga Khorramabad dhe e varrosën në fshatin Veysian, 40 kilometar më larg.
Qindra protestues u mblodhën në varrezat e Khorramabadit dhe brohoritën parulla kundër qeverisë, duke përfshirë "vdekje diktatorit" - një referencë për Udhëheqësin Suprem Ayatollah Khamenei.
© SYRI.net