Kryeministrja e Francës Elisabeth Borne paralajmëroi se rasti më i keq këtë dimër mund të çojë në ndërprerje dy-orëshe të energjisë elektrike në shtëpitë e francezëve, në mes të një krize të gjerë energjetike të përkeqësuar nga lufta në Ukrainë.

Komentet e Borne për kanalin televiziv TMC të martën mbrëma erdhën përpara një takimi të posaçëm të qeverisë të mërkurën, i fokusuar në çështjet e energjisë dhe klimës.

Borne i tha TMC se situata është pjesërisht për shkak të pasojave të luftës në Ukrainë dhe gjithashtu të mbylljes së planifikuar të rreth gjysmës së 56 reaktorëve bërthamorë të Francës për mirëmbajtje, veçanërisht për të riparuar problemet e gërryerjes. Franca mbështetet në energjinë bërthamore për rreth 67% të energjisë elektrike të saj - më shumë se çdo vend tjetër - dhe në gaz për rreth 7%.

"Kjo do të thotë se ne po prodhojmë më pak energji elektrike dhe mund të ketë momente, nëse është shumë ftohtë, ku mund të kemi probleme me furnizimin me energji elektrike," tha Borne.

"Në një rast të tillë ... do ta ndërprisnim, me rotacion, lagje pas lagje, jo më shumë se dy orë," tha ajo.

Megjithatë, Borne tha se gazi nuk do të ndërpritet në shtëpitë franceze, pasi njerëzit e përdorin atë kryesisht për ngrohje.

Gazi potencialisht mund të racionohet për bizneset që janë konsumatorët më të mëdhenj, tha ajo.

Ajo shpjegoi se një vendim i tillë do të nxitej nga një kombinim i rrethanave të këqija, duke përfshirë ndërprerjen e furnizimit me gaz nga Rusia, kufizimet në importet e gazit natyror të lëngshëm dhe një dimër shumë të ftohtë.

Kompania ruse energjetike e kontrolluar nga shteti Gazprom tha se do të pezullojë të gjitha dërgesat e gazit për kompaninë franceze Engie, duke filluar nga e enjtja, për një mosmarrëveshje financiare. Engie tha se tashmë ka siguruar mjaft gaz për të përmbushur angazhimet e saj ndaj klientëve.

Ministrja franceze për tranzicionin e energjisë, Agnes Pannier-Runacher, tha të martën se rezervat strategjike energjetike të vendit ishin plot 90%. Franca përshkroi një plan energjetik në qershor, duke synuar një reduktim prej 10% të përdorimit të energjisë deri në vitin 2024.

Përveç kësaj, Gazprom ndaloi rrjedhën e gazit natyror përmes një tubacioni të madh nga Rusia në Evropë të mërkurën herët, një lëvizje e përkohshme për të njoftuar paraprakisht. Gazprom kishte planifikuar të shkurtonte rrjedhën e gazit përmes gazsjellësit Nord Stream 1 deri të shtunën për atë që thotë se është një pauzë tre-ditore për mirëmbajtjen rutinë në një stacion kompresori.