Një elektricist gjerman doli në gjyq të enjten i akuzuar për vrasjen e një burri dhe gjymtim të disa të tjerëve duke kryer operacione të paligjshme në organet e tyre gjenitale.

66-vjeçari tha në një gjykatë rajonale në Mynih se ai i kreu procedurat me kërkesën e burrave.

I pandehuri, emri i të cilit nuk u publikua për arsye privatësie, pretendoi se fillimisht ofronte shërbime seksuale në faqet e internetit sado-mazokiste për të fituar para për të shlyer borxhet.

Më vonë, burri dyshohet se e zgjeroi repertorin e tij duke kryer operacione në tryezën e tij të kuzhinës në qytetin Markt Schëaben, duke u thënë viktimave të tij se ai ishte një profesionist mjekësor i trajnuar, raportoi agjencia gjermane e lajmeve dpa.

I pandehuri i tha gjykatës se ai kastroi, ose i preu pjesërisht organet gjenitale të tetë burrave midis korrikut 2018 dhe marsit 2020. Por ai mohoi përgjegjësinë për vdekjen e një burri, i cili vdiq disa ditë pasi i pandehuri kreu një procedurë ndaj tij.

Trupi i të vdekurit u gjet në një kuti nga policia tre javë më vonë.

Prokurorët e kanë akuzuar të pandehurin për vrasje, për mosthirrjen e ndihmës në rastin e të vdekurit dhe për lëndim të rëndë dhe të rrezikshëm trupor.