Kompania farmaceutike Merck thotë se i ka kërkuar Agjencisë Evropiane të Barnave (EMA) të autorizojë barnën e saj antivirale Covid, pilulën e parë që ka treguar se trajton sëmundjen.

Në një deklaratë të hënën, Merck tha se rregullatori i barnave të BE-së kishte filluar një proces të përshpejtuar licencimi për molnupiravir. Nëse jepet drita jeshile, ai do të ishte trajtimi i parë për Covid që nuk ka nevojë të merret me gjilpëra apo infuzione intravenoze.

Në fillim të këtij muaji, Merck i kërkoi Administratës Amerikane të Ushqimit dhe Barnave (FDA) që të miratonte molnupiravirin, dhe një vendim pritet brenda disa javësh.

Associated Press tha se “ Kompania raportoi këtë muaj se pilula përgjysmoi shtrimet në spital dhe vdekjet në mesin e pacientëve me simptoma të hershme të Covid. Rezultatet ishin aq të forta sa ekspertë të pavarur mjekësorë që monitoronin provën rekomanduan ndalimin më herët të tij.

Një pilulë antivirale që njerëzit mund të marrin në shtëpi për të reduktuar simptomat e tyre dhe për të shpejtuar shërimin mund të jetë novator, duke lehtësuar ngarkesën dërrmuese të rasteve në spitale dhe duke ndihmuar në frenimin e shpërthimeve në vendet më të varfra me sisteme të dobëta të kujdesit shëndetësor.”