Gjykata Penale Ndërkombëtare po kërkon urdhërarreste për liderin e Hamasit, Yahya Sinwar dhe kryeministrin izraelit Benjamin Netanyahu me akuza për krime lufte dhe krime kundër njerëzimit lidhur me sulmet e 7 tetorit në Izrael dhe luftën që pasoi në Gaza, tha kryeprokurori i gjykatës, Karim Khan për CNN. Christiane Amanpour në një intervistë ekskluzive të hënën.

Khan tha se GJNP po kërkon gjithashtu urdhër për Ministrin e Mbrojtjes të Izraelit, Yoav Gallant, si dhe dy liderë të tjerë të lartë të Hamasit - Mohammed Diab Ibrahim al-Masri, udhëheqësi i Brigadave Al Qassem dhe i njohur më mirë si Mohammed Deif, dhe Ismail Haniyeh, lider politik i Hamasit.

Urdhërarrestet kundër politikanëve izraelitë shënojnë herën e parë që GJNP-ja ka shënjestruar udhëheqësin më të lartë të një aleati të ngushtë të Shteteve të Bashkuara. Vendimi e vendos Netanyahu-n në shoqërinë e presidentit rus Vladimir Putin, për të cilin Gjykata Ndërkombëtare e Hagës lëshoi një urdhër arresti për luftën e Moskës kundër Ukrainës.

Një panel gjyqtarësh të GJNP-së tani do të shqyrtojë kërkesën e Khan-it për urdhërarrestet.

Khan tha se akuzat kundër Sinwar-it, Haniyeh-ut dhe al-Masri-t përfshijnë "shfarosje, vrasje, marrje pengjesh, përdhunim dhe sulm seksual në paraburgim".

"Bota u trondit më 7 tetor kur njerëzit u nxorën nga dhomat e tyre të gjumit, nga shtëpitë e tyre, nga kibucët e ndryshëm në Izrael", tha Khan për Amanpour, duke shtuar se "njerëzit kanë vuajtur jashtëzakonisht shumë".

Akuzat kundër Netanyahu-t dhe Gallantit përfshijnë "shkaktim të shfarosjes, shkaktimin e urisë si metodë lufte, duke përfshirë mohimin e furnizimeve me ndihma humanitare, duke synuar qëllimisht civilët në konflikt", i tha Khan Amanpour.

Kur raportet u shfaqën muajin e kaluar se kryeprokurori i GJNP-së po shqyrtonte këtë mënyrë veprimi, Netanyahu tha se çdo urdhër arresti i GJNP-së kundër zyrtarëve të lartë të qeverisë dhe ushtarakëve izraelitë "do të ishte një fyerje e përmasave historike" dhe se Izraeli "ka një sistem ligjor të pavarur që heton me rigorozitet të gjitha shkeljet e ligjit."

I pyetur nga Amanpour në lidhje me komentet e bëra nga Netanyahu, Khan tha: "Askush nuk është mbi ligjin".

Ai tha se nëse Izraeli nuk pajtohet me GJNP-në, "ata janë të lirë, pavarësisht kundërshtimeve të tyre ndaj juridiksionit, të ngrenë një sfidë para gjyqtarëve të gjykatës dhe kjo është ajo që unë i këshilloj të bëjnë".

Izraeli dhe Shtetet e Bashkuara nuk janë anëtarë të GJNP-së. Megjithatë, GJNP-ja pretendon se ka juridiksion mbi Gazën, Jerusalemin Lindor dhe Bregun Perëndimor pasi udhëheqësit palestinezë ranë dakord zyrtarisht të jenë të detyruar nga parimet themeluese të gjykatës në vitin 2015./ CNN-Syri.net/