Presidenti i Shteteve të Bashkuara, Donald Trump, ka sugjeruar ngrirjen e luftës në Ukrainë në vijat aktuale të frontit, dhe përdorimin e këtyre vijave si pikënisje për negociata të ardhshme mbi territorin.

Bisedimet e paqes që synojnë t’i japin fund luftës në Ukrainë deri më tani kanë ngecur, pavarësisht mburrjes së Trump gjatë fushatës së tij presidenciale vitin e kaluar, se mund t’i jepte fund luftës brenda “24 orësh” pas inaugurimit të tij.

Rusia këmbëngul se duhet të lejohet të mbajë të gjithë tokën që i ka sekuestruar Ukrainës dhe t'i jepet më shumë, nëse do të shqyrtojë një armëpushim. Ukraina ka refuzuar këtë dhe Trump nuk ka ndërmarrë asnjë hap në asnjërën anë.

Ja se si duken vijat e frontit aktual dhe si kanë reaguar Rusia dhe Ukraina ndaj këtij propozimi të fundit:

Çfarë ka propozuar Trump?

Trump ka propozuar ndalimin e luftës aty ku po zhvillohen luftimet.

“Ata mund të negociojnë diçka më vonë. Por unë thashë të ndalemi në vijën e betejës”, u tha Trump gazetarëve në Air Force One të dielën.

“Pjesa tjetër është shumë e vështirë për t’u negociuar nëse do të thuash, ‘Ju pranoni këtë. Ne pranojmë atë.’”

Kur Trump u pyet nëse e kishte këshilluar Presidentin ukrainas Volodymyr Zelenskyy që të lëshonte të gjithë rajonin lindor të Donbasit, i cili kufizohet me Rusinë dhe të cilin ajo e ka pretenduar, ai tha jo.

“Le të pritet ashtu siç është. Është prerë tani. Mendoj se 78 përqind e tokës është tashmë e pushtuar nga Rusia”, i tha Trump një gazetari nga agjencia e lajmeve Reuters.

"Ju e lini ashtu siç është tani. Ata mund... të negociojnë diçka më vonë."

Ku janë vijat e frontit tani?

Gjatë luftës së saj gati katërvjeçare në Ukrainë, Rusia ka pushtuar territor kryesisht në katër provinca lindore dhe jugore të Ukrainës: Donetsk, Luhansk, Kherson dhe Zaporizhia. Ajo gjithashtu kontrollon një pjesë të vogël të provincës Kharkiv.

Donetsku dhe Luhansku quhen së bashku Donbas, ku janë zhvilluar më shumë luftime.

Rusia kontrollon të gjithë Luhanskun dhe pjesën më të madhe të Donetskut, duke përfshirë zonat përreth qyteteve Sloviansk dhe Kramatorsk.

Rusia kontrollon gjithashtu rreth 75 përqind të Khersonit dhe Zaporizhzhies.

Zaporizhia është një rajon i rëndësishëm industrial i njohur për prodhimin e çelikut, aluminit dhe avionëve dhe është gjithashtu shtëpia e centralit bërthamor më të madh në Evropë.

Si i janë përgjigjur këtij propozimi Ukraina dhe aleatët e saj evropianë?

Ukraina dhe Evropa e kanë mbështetur planin e Trumpit për të ngrirë linjat e betejës.

Të martën, udhëheqësit evropianë dhe Zelenskyy nënshkruan një deklaratë duke thënë se e mbështesin “fuqishëm” propozimin e Trump.

“Linja aktuale e kontaktit duhet të jetë pika fillestare e negociatave”, thuhet në deklaratë.

Më parë, Ukraina ka këmbëngulur në rimarrjen e të gjithë tokës së saj. Por Trump ka hedhur poshtë nëse Ukraina duhet apo jo të detyrohet t’i lëshojë tokë Rusisë në çdo marrëveshje paqeje.

Në gusht, përpara një takimi me Presidentin rus Vladimir Putin në Alaska për të diskutuar luftën, Trump deklaroi se si Rusia ashtu edhe Ukraina do të duhej të lëshonin territor për t'i dhënë fund luftës.

“Do të ketë disa shkëmbime territoresh”, u tha Trump gazetarëve në atë kohë.

Pastaj, në shtator, Trump duket se bëri një kthesë 180 centimetrash, duke thënë se Ukraina mund ta fitonte luftën ushtarakisht dhe të rimerrte territoret e pushtuara nga Rusia, përfshirë Gadishullin e Krimesë, të cilin e pushtoi në vitin 2014, dhe zona të tjera në Ukrainën lindore. “Ukraina do të ishte në gjendje ta merrte përsëri vendin e saj në formën e tij origjinale dhe, kush e di, ndoshta do të shkonte edhe më tej se kaq!”, shkroi Trump në një postim në rrjetet sociale.

Si është përgjigjur Rusia?

Rusia e ka hedhur poshtë planin.

Të martën, Ministri i Jashtëm rus Sergej Lavrov tha se Rusia është e përkushtuar ndaj “një paqeje afatgjatë dhe të qëndrueshme – jo një armëpushimi të menjëhershëm që nuk do të çojë askund”.

Zëdhënësi i Kremlinit, Dmitry Peskov, shtoi se “qëndrueshmëria e qëndrimit të Rusisë nuk ndryshon”, duke iu referuar kërkesave të saj të ashpra për t’i dhënë fund luftës, përfshirë një tërheqje të plotë të trupave ukrainase nga rajonet lindore që Moska i ka pretenduar.

Të martën, Reuters raportoi se Rusia i kishte dërguar një komunikatë private SHBA-së gjatë fundjavës, duke kërkuar kontrollin e të gjithë Donbasit - jo vetëm të pjesëve që ka pushtuar tashmë.

Një takim i planifikuar midis Trump dhe Putin në Budapest të Hungarisë, në dy javët e ardhshme, u anulua këtë javë, pasi Trump tha se nuk donte një “takim të kotë” me Putinin.

“Nuk dukej sikur do të arrinim aty ku duhej, kështu që e anulova. Por do ta bëjmë në të ardhmen”, u tha Trump gazetarëve në Shtëpinë e Bardhë të mërkurën./ Al Jazeera.