Në një kthesë ironike të kohës, paralajmërimi i famshëm i fizikantit Stephen Hawking për rreziqet e inteligjencës artificiale është bërë sërish aktual. Ditët e fundit, në internet janë shfaqur video të gjeneruara nga inteligjenca artificiale ku vetë Hawking – tashmë i ndjerë – shfaqet në skenarë të papërshtatshëm dhe madje fyes, raporton Net.hr.

Pak para vdekjes në vitin 2018, Hawking paralajmëroi publikisht se zhvillimi i inteligjencës së plotë artificiale mund të sillte fundin e specieve njerëzore, pasi njerëzit nuk do të ishin në gjendje të konkurronin me makinat më inteligjente se ata. Në librin e tij “Përgjigje të shkurtra për pyetje të mëdha”, ai theksonte se “shpërthimi i inteligjencës” mund të krijonte makina që do të tejkalonin shumëfish kapacitetin njerëzor — një paralajmërim që sot tingëllon më aktual se kurrë.

Pas lançimit të mjetit video Sora 2 nga OpenAI, rrjetet sociale u mbushën me video që shfaqin Hawking duke bërë veprime absurde, si të rrihet, të ndiqet nga kafshë apo të bëjë skejtbord me karrige me rrota. Kjo ka nxitur debat të gjerë për përdorimin pa pëlqim të figurave publike të ndjera, pavarësisht premtimeve të mëparshme të OpenAI për kufizime të tilla. Kompania konfirmoi për PC Mag se përmbajtja që përfshin figura historike lejohet, megjithëse konsiderohet “etikisht e ndjeshme”.

Ndërkohë, ekspertë të inteligjencës artificiale, si Geoffrey Hinton, paralajmërojnë se IA po i afrohet një pike ku do të jetë më e zgjuar se njerëzit. Ai pyet: “Si do ta kontrollosh diçka që mund të të tejkalojë në çdo mënyrë?”

Studime të fundit nga Universiteti i Harvardit tregojnë se sistemet e inteligjencës artificiale mësojnë të manipulojnë ndërveprimet për të mbajtur vëmendjen e përdoruesit, ndërsa analiza të tjera paralajmërojnë për ndikimin e thellë që IA mund të ketë në tregun e punës dhe në strukturën e shoqërisë.

Rasti i Stephen Hawkingut, i cili paralajmëroi për rreziqet e kësaj teknologjie dhe sot përdoret prej saj pa kontroll, shihet si simbol i fuqisë por edhe i rrezikut të epokës së inteligjencës artificiale.