Rezultate alarmante: 9 në 10 persona nuk arrijnë të dallojnë përmbajtjen e krijuar nga inteligjenca artificiale

Një studim i ri ka ngritur shqetësime serioze mbi ndikimin e inteligjencës artificiale në aftësinë e njerëzve për të dalluar realitetin nga përmbajtja e manipuluar në internet. Sipas rezultateve të publikuara nga kompania e sigurisë kibernetike Malwarebytes, pothuajse 90 për qind e njerëzve e kanë gjithnjë e më të vështirë të kuptojnë se çfarë është reale dhe çfarë është krijuar ose manipuluar nga inteligjenca artificiale.

Anketa u zhvillua me 1,500 pjesëmarrës nga Austria, Britania e Madhe, Gjermania, Zvicra dhe Shtetet e Bashkuara të Amerikës. Sipas saj, deri në 88 për qind e të anketuarve deklaruan se po bëhet gjithnjë e më e vështirë të dallojnë nëse përmbajtja online është autentike apo e krijuar nga sisteme të inteligjencës artificiale.

Shqetësues mbetet edhe fakti se pothuajse e njëjta përqindje e pjesëmarrësve thanë se e kanë të vështirë të dallojnë mashtrimet nga përmbajtja e besueshme. Kjo shifër paraqet një rritje të ndjeshme krahasuar me vitin e kaluar, kur vetëm 66 për qind e të anketuarve kishin raportuar të njëjtin problem.

Sondazhi zbuloi gjithashtu se një në katër persona ka marrë gjatë 12 muajve të fundit mesazhe të personalizuara që synonin mashtrimin. Ekspertët paralajmërojnë se mashtruesit po përdorin gjithnjë e më shumë inteligjencën artificiale për të shfrytëzuar të dhënat personale dhe marrëdhëniet e besimit mes njerëzve.

“Përdorimi i chatbot-eve dhe mjeteve të avancuara të inteligjencës artificiale po e zbeh gjithnjë e më shumë vijën ndarëse mes së vërtetës dhe së rremes”, thuhet në raportin e Malwarebytes.

Si pasojë e këtyre shqetësimeve, përdoruesit po tregohen më të kujdesshëm në aktivitetin e tyre online. Më shumë se tre në pesë persona deklaruan se kanë reduktuar përdorimin e rrjeteve sociale, kanë fshirë përmbajtje të vjetër ose po publikojnë më pak informacione personale për veten dhe familjet e tyre.

Ekspertët paralajmërojnë se kjo tendencë mund të ketë pasoja edhe për platformat e mëdha sociale, modelet e biznesit të të cilave mbështeten kryesisht në ndarjen e informacionit nga përdoruesit dhe përdorimin e tij për reklama të targetuara.

Sipas raportit, rritja e përdorimit të inteligjencës artificiale po krijon një sfidë të re për shoqërinë moderne: ruajtjen e besimit në informacionin që qarkullon në internet.