Prodhuesi gjerman i veturave BMW AG, me seli në Mynih, ka paralajmëruar një rënie “të ndjeshme” të fitimit të saj para tatimit për këtë vit, kryesisht si pasojë e dobësimit të kërkesës në Kinë dhe ndikimit të situatës në Lindjen e Mesme.

BMW, pronare e markave BMW, MINI, Rolls-Royce dhe BMW Motorrad, e bëri të ditur këtë në një paralajmërim për fitimin të publikuar të martën, ku theksoi përkeqësimin e kushteve të tregut dhe kostot e masave të ristrukturimit.

Pas njoftimit, aksionet e kompanisë ranë me më shumë se 7% në tregjet evropiane gjatë mëngjesit të së mërkurës.

Sipas kompanisë, kërkesa në Kinë është dobësuar më tej, duke sjellë rritje të konkurrencës në të gjithë rajonin.

Gjithashtu, BMW theksoi se tensionet në Lindjen e Mesme kanë pasur ndikim më të madh se sa ishte parashikuar, duke mbajtur kostot e energjisë në nivele të larta dhe duke ndikuar negativisht në kërkesën e konsumatorëve.

Kompania tani pret që dërgesat e automjeteve të shënojnë një rënie të lehtë krahasuar me vitin e kaluar, në vend që të mbeten të qëndrueshme siç ishte parashikuar më herët.

Si rezultat, BMW parashikon një rënie të ndjeshme të fitimit para tatimit nga 10.2 miliardë euro të regjistruara vitin e kaluar.