Policia e Vlorës ka ndjekur sot në mëngjes në rrugët e Vlorës, një shofer që shkaktoi një aksident në lagjen "Pavarësia" tek Akademia e Marinës dhe u arratis menjëherë nga vendi i ngjarjes. Arrestimi i tij u bë i mundur vetëm në Lungomare.
Sot rreth orës 6:35, në Sallën Operative të Vlorës u njoftua me anë të një telefonate se në lagjen ''Pavarësia'', tek ''Akademia e Marinës'', një makinë'' Renault" kishte goditur një grua 76-vjeçare me iniciale R.I dhe ishte larguar.
Gruaja e lënduar është transportuar menjëherë në Spitalin Rajonal Vlorë, ku i është dhënë ndihma e duhur mjekësore dhe gjendet jashtë rrezikut për jetën.
Policia menjëherë pas kësaj është vënë në ndjekje të autorit dhe në Lungomare ka bërë të mundur bllokimin e mjetit dhe të drejtuesit A.L., 34 vjeç, banues në Vlorë si dhe shoqërimin e tij në Komisariat.
Tashmë Grupi Hetimor po vazhdon kryerjen e veprimeve të mëtejshme hetimore për zbardhjen e plotë të rrethanave të ngjarjes.
© SYRI.net