Kreu i Partisë Demokratike, Sali Berisha, ka publikuar sot një postim në Facebook, të shoqëruar me dixhiturën se ligji i propozuar nga qeveria për “barazinë gjinore” synon, sipas tij, “përmbysjen e familjes dhe vlerave të saj”, si dhe “vendosjen e censurës dhe mohimin e të drejtave prindërore”. Berisha akuzon mazhorancën se nën petkun e barazisë po tenton të fusë elementë ideologjikë që shkelin të drejtat themelore të qytetarëve.
Në postim, ai përfshin një video të fjalës së tij në Kuvend, ku e cilëson seancën si “krejt të ndryshme nga çdo tjetër”, duke theksuar se ligji i ri është “ideologjik” dhe synon “përmbysjen e rendit gjinor binar mijëvjeçar”, të familjes dhe librave të shenjtë. Berisha pretendon se drafti “shkatërron barazinë e vërtetë midis burrit e gruas, nënës e babait”, duke e zëvendësuar atë me “përkatësi të shumëfishta gjinore” që, sipas tij, bie ndesh me Kushtetutën.
Ai akuzon qeverinë se po promovon “doktrinën post-marksiste të ekstremit të majtë”, e cila, sipas tij, synon një shoqëri “pa familje”, duke e cilësuar këtë ligj si të rrëzuar në “21 vende të BE-së” dhe të hedhur poshtë nga Gjykata Kushtetuese franceze. Në vijim, Berisha thotë se drafti “i mohon prindërve të drejtën për të edukuar fëmijët sipas bindjeve të tyre”, dhe se mund të “gjobisë udhëheqësit fetarë” për mësimet e librave të shenjtë.
Në mbyllje të fjalës së tij, Berisha kërkon nga ambasadori Gonzato të sqarojë publikisht se cila direktivë e BE-së kërkon miratimin e një ligji të tillë, ndërsa thekson se do të mbetet “i paepur” në kundërshtimin e tij ndaj projektligjit që, “godet familjen, identitetin biologjik dhe moralin shoqëror”.
Fjala e Berishës:
Të dashur qytetarë dhe qytetare, kjo seancë është një seancë krejt tjetër nga çdo seancë që keni ndjekur gjer sot.
Këtu kanë sjellë një ligj të quajtur në thonjëza për barazinë gjinore, por një ligj kryekëput ideologjik, i cili bazohet absolutisht në përmbysjen e rendit gjinor binar shekullor dhe mijëvjeçar.
Në përmbysjen e familjes dhe vlerave të saj.
Në përmbysjen e librave të shenjtë dhe moralit të tyre.
Në përmbysjen e të drejtës prindërore për edukimin e fëmijës së tij.
Në përmbysjen e çdo standardi të njohur gjer sot.
Theksoj dhe ritheksoj një mijë herë se do mbetem i paepur në bindjet e mia dhe në programet e partisë për barazinë midis burrit dhe gruas, për barazinë midis nënës dhe babait, midis motrës dhe vëllait.
Por, pikërisht kjo barazi sot zhduket.
Sot merr goditjen më fatale sepse kjo barazi e bazuar në binaritetin grua dhe burrë, femër dhe mashkull, nënë dhe baba, tashmë transformohet në përkatësi të shumëfishta gjinore.
Tashmë transformohet në gjini me diversitet të gjerë duke përmbysur Kushtetutën e Shqipërisë, nenet themelore të saj të lirive dhe të drejtave të njeriut, të lirisë së besimit, të të drejtave të prindërve mbi fëmijët e vet.
Përmbyset kodi i familjes dhe kodet e tjera.
Të dashur qytetarë dhe qytetare, ky ligj i doktrinës post-marksiste, ekstremit të majtë më të rrezikshëm të kohërave, sepse Marksi nuk shkoi më përçudnimin dhe transfigurimin e familjes.
Marksi përcaktoi shkatërrimin e pronës private për ndërtimin e njeriut të ri.
Kushti i Marksit për njeriun e ri, ishte njeriu pa pranë.
Kushti i post-marksistëve për njeriun është njeriu pa familje.
Qytetarë dhe qytetare, sillet në emër të direktivave të BE. Ekspertë të shquar kanë pohuar se nga 10 direktiva të BE, në asnjërën prej tyre nuk flitet për përkatësi të shumëfishtë gjinore.
Në asnjërën prej tyre nuk flitet për gjini me diversitet të gjerë.
Një gazetar më tha se ambasadori Gonzato ka kërkuar votimin e ligjit.
I kërkoj të nderuarit ambasador të nxjerrë cila direktivë e BE e kërkon një gjë të tillë.
T’u thotë shqiptarëve, se direktivat janë aty.
Sepse ky ligj, është hedhur poshtë në 21 vende anëtare të BE.
Sepse ky ligj, është hedhur poshtë nga Gjykata Kushtetuese franceze në vitin 2016.
Sepse ky ligj, de facto, u mohon prindërve të drejtën e edukimit të fëmijëve të tyre bazuar në dhuntinë që u ka dhënë Zoti, vajzë apo djalë. Apo natyra për ata që nuk besojnë Zotin.
Sepse ky ligj, gjobit udhëheqësit fetarë, shpirtërore, në qoftë se ata besimtarëve do u parashtrojnë mësimet e Kuranit, Biblës, Talmudit.
Sepse ky ligj, de facto, në shoqërinë post-marksiste godet familjen, godet identitetin familjar të bazuar në bizaritetin biologjik.
Postimi i plotë:
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Berisha: Çdo demokrat të bashkohet me këtë protestë, me një kusht, jo si militant, por si qytetar
‘Kam bërë 3 mijë kilometra që të vij këtu’, protestuesit nuk i heqin çadrat dhe përplasen me policinë
I riu protestues: Jam lind e rrit në Itali, po iku Rama, unë do kthehem të jetoj në Shqipëri