Nga Jahja Drançolli - 13:01, 11/03/2021
Si sot, 15 vjet më parë (më 11 mars 2006), në qelinë e tij në Tribunalin e Hagës vdiq Slobodan Milosheviç ndryshe i njohur edhe si “Kasapi i Ballkanit”!
Νga fjalimi në Gazimestan më 28 qershor 1989, Milosheviç ka udhëhequr agresionin kundër republikave fqinje në mbështetje të programeve për krijimin e një Serbie të Madhe, dhe së këtejmi kishte shkaktuar shpërbërjen përfundimtare të Jugosllavisë të shoqëruar më luftëra dhe mizori masive kundër civilëve në Bosnje e Hercegovinë, Kroaci dhe Kosovë.
Pas humbjes ushtarake serbe në Kroaci dhe Bosnje, ai mori pjesë në përfundimin e Marrëveshjes së Paqes në Deyton SHBA (nëntor 1995).
Në vitin 1997, është zgjedhur President i Republikës Federale të Jugosllavisë, vit ky që përkon edhe me daljen publike të UÇK-së si fuqi e rëndësishme për mbrojtjen e popullatës civile të Kosovës përball krimeve të ushtrisë dhe forcave paramilitare serbe të udhëhequra pikërisht nga ai.
Përpjekjet e Milosheviçit për të dëbuar shqiptarët e Kosovës sidomos nga viti 1998 provokoi ndërhyrjen e NATO-s në pranverën e vitit 1999 dhe hyrjen e forcave ndërkombëtare të udhëhequra nga NATO në Kosovë.
Në fillim të Prillit 2001, ai u arrestua dhe më 28 qershor 2001 në ditën e Vidovdan-it, dymbëdhjetë vjet pasi fjalimit në Gazimestan u ekstradua në gjykatën e Hagës, para së cilës u akuzua për krime lufte dhe krime kundër njerëzimit në Kosovë dhe Kroaci, si dhe gjenocid në Bosnje.
Vdiq në qelinë e tij në Tribunalin e Hagës para përfundimit të gjykimit!
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
