Policia gjen kamera të vendosura për vëzhgimin rrugëve në kufirin mes Kosovës dhe Serbisë, arrestohet një person

14:35, 07/05/2024

Policia e Kosovës ka njoftuar se në rrugën malore nga fshati Ranillug në drejtim të fshatit Konçul (Serbi), kanë gjetur kamera, të cilat dyshohet se ishin vendosur nga persona të dyshuar që merren me kontrabandë të mallrave, për të vëzhguar rrugët, raporton Syri Kosova.

Nga Policia u bë e ditur se në atë lokacion, u arrestua një person, që po dyshohet se kishte shkuar për t’u kujdesur për kamerat.

I dyshuari, i cili është recidivist i veprës “Kontrabanda me mallra” ka përfunduar në ndalim policor, ndërsa automjeti i tij është sekuestruar.

“Njësia e TASK FORC-ës-Lindje (e përbërë nga Policia dhe Dogana e Kosovës), pas pranimit të informatave nga Njësia e Inteligjencës e Policisë Kufitare Lindje, për dyshime të vendosjeve të paautorizuara të kamerave në brezin kufitar në mes të Republikës së Kosovës dhe Serbisë, më 06.05.2024, në rrugën malore nga fshati Ranillug (RKS), në drejtim të fshatit Konçul (Serbi), kanë gjetur dy kamera me solar, të cilat ishin vendosur për të vëzhguar rrugët. Dyshohet se kamerat janë vendosur nga persona të dyshuar që merren me kontrabandë të mallrave.

I dyshuari, recidivist i veprës “Kontrabanda me mallra”, është shoqëruar në polici, ndërsa nga verifikimi i automjetit është vërtetuar se i njëjti nuk ka asnjë hyrje-dalje përmes Pikave të Kalimit Kufitar, andaj dyshohet se i njëjti, këtë automjet e kishte përdorur vetëm për kontrabandë të mallrave përmes rrugëve ilegale.

Lidhur me rastin, të gjitha veprimet janë ndërmarrë në bashkëpunim me Prokurorinë e Shtetit, me urdhër të prokurorit, i dyshuari është ndaluar për 48 orë, ndërsa automjeti sekuestrohet dhe dërgohet në terminalin doganor-Dheu i Bardhë.” – njoftoi Policia.

© SYRI.net

Lexo edhe:

• Prindërit e Hashim Thaçit shkojnë në Hagë për ta vizituar djalin e tyre në paraburgim
• Shkarkohet kryetari i Sindikatës së Policisë së Kosovës, Imer Zeqiri
• Kurti jep detaje nga takimi me Allens: Diskutova për reformat demokratike të bëra në vendin tonë dhe mbështetjen kryesore të SHBA-së