Abdixhiku: Kur vrasja e një gruaje zë vrasjen tjetër- femicidi në Kosovë nuk guxon të bëhet gjë e zakonshme

15:18, 16/04/2024

Kryetari i LDK-së, Lumir Abdixhiku, ka reaguar pas vrasjes së një gruaje nga burri i saj në Pejë.

Abdixhiku ka thënë se vrasja e grave është shqetësuese dhe se femicidi në Kosovë nuk mund të bëhet gjë e zakonshme.

“Ftoj të gjitha organet e rendit dhe sigurisë të veprojnë me përgjegjësi e pakompromis ndaj rastit të sotëm dhe jo vetëm. Shteti duhet të jetë mburojë për gratë. Jeta e tyre nuk guxon të mbetet jetë për mbijetesë.” – thuhet ndër të tjera në njoftimin që e ka postuar LDK-ja në Facebook.

“LDK do ta shqyrtoj çdo mundësi institucionale që të ngris diskutimin rreth vendimmarrjes institucionale për parandalimin e rasteve të tilla.” – përfundon reagimi.

Reagim i plotë:

Kryetari i LDK-së, Lumir Abdixhiku reagon pas ngjarjes së sotme ku u vra në Pejë, Gjyljeta Ukella, nga bashkëshorti i saj.

“Kur vrasja e një gruaje zë vrasjen tjetër!

Vrasja e grave në Kosovë ka marrë përmasa shqetësuese. Ende pa u bërë një javë, sot po zgjohemi me një lajm tjetër të trishtë. Gjyljeta Ukella, edhe një grua, sot është viktimë nga burri i saj. Kjo s’është gjendje normale, e ne nuk mund të normalizojmë këtë alarm nacional që na shfaqet para sysh nga dy herë në javë vetëm me reagime.

Nuk mund të presim që cikli nga dhuna në reagim, deri në fatalitetin tjetër të na normalizohet. Femicidi në Kosovë nuk guxon të bëhet gjë e zakonshme; e asnjë deklaratë e sotme nuk e kthen dot prapa jetën e Gjyljeta Ukella.

Ftoj të gjitha organet e rendit dhe sigurisë të veprojnë me përgjegjësi e pakompromis ndaj rastit të sotëm dhe jo vetëm. Shteti duhet të jetë mburojë për gratë. Jeta e tyre nuk guxon të mbetet jetë për mbijetesë.

Nga lehtësia e posedimit të armës së zjarrit, te gjendja reaktive e institucioneve tona, kushtet strehuese të grave që kërkojnë mbrotje, e gjuha denigruese ndaj grave; problemet i kemi të shumta e veprimet plotësisht të pamjaftueshme.

LDK do ta shqyrtoj çdo mundësi institucionale që të ngris diskutimin rreth vendimmarrjes institucionale për parandalimin e rasteve të tilla.”

© SYRI.net

Lexo edhe:

• Abdixhiku: Do të ndërtojmë termocentral me gaz gjysmë miliardësh – koeficienti për paga do të jetë 150 euro
• Osmani pret në takim Peneveyren, flasin rreth anëtarësimit të Kosovës në Këshillin e Evropës
• Serbia ngre flamurin e bardhë? Vuçiç: Ka shumë gjasa që Kosova të anëtarësohet në Këshillin e Evropës