“Synimi ynë ka qenë që t’i adresojmë problemet kryesore në kohën e paqartësive të mëdha në aspektin shëndetësor dhe ekonomik. Ekonomia gjatë vitit 2020 do të tkurret për 6.7 për qind si rezultat i pandemisë. Më 2021 pritet që ekonomia të rritet në 5.2 për qind dhe të kthehet sikur para pandemisë. Mbi 320 milionë euro do të kemi rënie në të hyra deri në fund të vitit. Një pjesë e obligimeve për investime publike do të barten për vitin e ardhshëm”.

Mimoza Kusari Lila nga LVV ka kritikuar Qeverinë duke thënë se pavarësisht situatës me pandeminë, ka shkurtuar mjetet financiare për arsimin e shëndetësinë, por ka rritur buxhetin për asfalt. Këto probleme, sipas saj, janë më të mëdhatë në 20 vitet e fundit.

“Duhet t’u tregojmë qytetarëve se për vitin 2021 që buxheti për rimëkëmbje ekonomike do të jetë 168 milionë euro më pak se vitin e kaluar. Kemi zvogëlim të buxhetit në disa ministri, por ka rritje në ministrinë e Infrastrukturës për 53 milionë euro. Kemi rritje të buxhetit për asfalt, kurse zvogëlim për arsim. Projektbuxheti duhet te flasë për prioritete të qeverisë, neve na vjen projektbuxheti me 54 milionë më shumë për asfalt, keni shtuar autostrada të reja, kurse kemi zvogëlim të buxhetit për ministrinë e Arsimit, Shëndetësisë”.

Deputeti i PDK-së, Bedri Hamza, ka thënë se rënia ekonomike mund të jetë më e thellë. Hamza ka deklaruar se shumë projekte që parashihen në programin e Qeverisë nuk janë përfshirë në buxhet.

“Sa vende të punës do të humbin nga kjo rënie ekonomike, cili është ndikimi në humbjen e vendeve të punës. E shohim një diskrepancë të madhe ndërmjet programit të qeverisë dhe buxhetit që na është prezantuar. Aty na është përmendur investimi në shëndetësi, aty është përmendur shërbimi ushtarak. Këto nuk janë në buxhet. Është shqetësuese rritja e borxhit publik, e dimë që Kosova ka borxhin më të ulët në rajon, por kjo nuk guxon të na bëjë qe të hyjmë borxh pa kontroll”, ka thënë ai.