Një ditë pas bisedimeve për paqe në Ukrainë, BE vendos sanksione të reja ndaj Rusisë

Bashkimi Evropian ka rënë dakord për vendosje të një raundi të ri sanksionesh kundër Rusisë.

Ky vendim vjen një ditë pas bisedimeve SHBA-Rusinë Riad për paqe në Ukrainë dhe vetëm disa ditë para tre vjetorit nga fillimi i luftës Rusi-Ukrainë.

BBC raporton se sanksionet do të miratohen zyrtarisht nga ministrat e BE-së të hënën, në përvjetorin e tretë të pushtimit të plotë të Ukrainës nga Moska.

Kujtojmë se sekretari i Shtetit në SHBA, Marco Rubio, është shprehur se Evropa do të thirret në tryezën e bisedimeve për të diskutuar lehtësimin e sanksioneve për Kremlinin.

“Ka palë të tjera që kanë sanksione, Bashkimi Evropian do të duhet të jetë në tryezë në një moment,” tha Rubio të martën pas takimit me homologun e tij rus në Riad të Arabisë Saudite.
Rubio theksoi se duhet të bëhen lëshime nga “të gjitha palët”.

Kur u pyet për përjashtimin e Evropës nga procesi, ai u përgjigj: “Askush nuk po anashkalohet”.

Megjithatë, BE është e prirur të ruajë politikën e saj ndëshkuese.

Kjo është paketa e 16-të të kufizimeve të BE kundër Rusisë që nga shkurti i vitit 2022.

Sanksionet e reja paraqesin një ndalim të importeve të aluminit rus, një ide që u diskutua në të kaluarën, por nuk u miratua kurrë për shkak të rezervimit të disa vendeve anëtare që shqetësoheshin për ndikimin e tij ekonomik.

Alumini i papërpunuar rus përbën rreth 6% të importeve të aluminit të BE-së, një pjesë që është ulur gjatë viteve të fundit pasi prodhuesit evropianë u larguan nga furnizuesit rusë.

© SYRI.net

Lexo edhe:

• BBC: Gruaja franceze e mbajtur peng nga burri i saj për 12 vjet, shpëtohet në Pakistan
• Franca konfirmon rastin e parë të Ebolës, mjeku i infektuar në Kongo futet në izolim
• Irani rihap pjesën perëndimore të hapësirës ajrore të vendit