Richard Grenell, i dërguari i administratës Trump për "misione speciale," tha se do të konsideronte kandidimin për garën për guvernator të Kalifornisë nëse ish-zv/presidentja Kamala Harris hyn në garë.
"Kjo është një temë e nxehtë. Do të bëj pak lajm: varet nëse Kamala Harris kandidon," tha Grenell për gazetarët në Konferencën e Sigurisë në Mynih pasi u pyet se kë do të mbështeste në garën për guvernator.
"Nëse Kamala Harris kandidon për guvernatore, unë besoj se ajo ka kaq shumë probleme dhe qindra milionë dollarë do të shpenzoheshin për të edukuar votuesit se sa e tmerrshme është, që kjo do të ishte një mundësi e re për Kaliforninë, dhe republikanët në fakt do të kishin një shans. Dhe nuk do të thosha 'jo'," tha Grenell gjatë vizitës së tij në Gjermani.
Trump e emëroi Grenellin për të mbikëqyrur reagimin e administratës ndaj zjarreve pyjore në Kaliforninë Jugore muajin e kaluar. Grenell u shfaq në Los Angeles javën e kaluar së bashku me administratorin e Agjencisë për Mbrojtjen e Mjedisit, Lee Zeldin, dhe kryetaren demokrate të bashkisë së Los Angeles-it, Karen Bass, për të vlerësuar përpjekjet për rikuperimin pas zjarreve dhe pastrimin e mbeturinave.
Në fund të muajit të kaluar, Grenell udhëtoi në Karakas dhe u takua me presidentin e Venezuelës, Nicolas Maduro, duke sjellë lirimin e gjashtë amerikanëve të ndaluar. Takimi i Grenellit ishte pjesë e përpjekjeve të administratës Trump për të deportuar emigrantët e dhunshëm kriminalë ilegalë nga Shtetet e Bashkuara në vendin e tyre të origjinës.
Trump gjithashtu e emëroi Grenellin si drejtor të përkohshëm ekzekutiv të Qendrës Kennedy pasi shkarkoi Bordin e Administrimit të Qendrës Kennedy dhe emëroi veten si kryetar.
Grenell, një banor i Los Angeles-it, shprehu interes për të kandiduar për guvernator kur Gavin Newsom (D-CA) u përball me një përpjekje për ta shkarkuar në vitin 2021, por Grenell e tërhoqi kandidaturën e tij.
Që kur humbi zgjedhjet presidenciale dhe la detyrën, Harris është kthyer në shtetin e saj të lindjes dhe përgjithësisht ka shmangur shtypin. Harris ende nuk ka shpallur planet e saj të ardhshme, por sondazhet e fundit tregojnë se ajo ka avantazh në një garë primare demokrate nëse do të kandidonte për guvernatore.
Një sondazh i ri tregoi se 57% e votuesve primarë të partisë së Harrisit do të votonin për të në një zgjedhje hipotetike. Newsom ka kufizime mandati në vitin 2026 dhe duket se po synon një pozicion më të lartë, si presidenca në vitin 2028.
Gazeta Washington Examiner iu drejtua Partisë Demokratike të Kalifornisë dhe zyrës së Harrisit për komente.
Komentet për kandidimin në Kaliforni vijnë ndërsa Grenelli ndodhet në Europë me zv/presidentin JD Vance, sekretarin e mbrojtjes Pete Hegseth dhe sekretarin e shtetit Marco Rubio, ndërsa administrata Trump po negocion për t'i dhënë fund luftës në Ukrainë.
Grenell lavdëroi Vance-in para fjalimit të tij në Konferencën e Sigurisë në Mynih. "Është shumë mbresëlënëse të shohësh sa lehtë ai flet për politikën e jashtme," tha Grenell. "Ajo që më bëri përshtypje është që ai ndihet shumë komod me detajet."
Trump foli me presidentin rus Vladimir Putin dhe presidentin ukrainas Volodymyr Zelensky të mërkurën për t'i dhënë fund luftës. I dërguari special nuk pranoi të diskutojë se si shkuan takimet për negociatat Rusi-Ukrainë, por shprehu kënaqësinë për mënyrën se si aleatët po përgjigjen ndaj zhvillimeve të fundit.
"Unë jam ekspert për Gjermaninë sepse kam qenë ambasador këtu, dhe ajo që më kënaq është të dëgjoj gjermanët të thonë se duhet t'i kishim bërë këto vite më parë," tha ai. "Dhe po përpiqem të përmbahem për të mos thënë, 'Ju thashë. Donald Trump kishte të drejtë.'"
"Jam i habitur që ekziston një bindje reale, e cila po shprehet tani, jo vetëm një mendim, por një shprehje e vërtetë se ata duhet t'i kishin bërë këto gjëra shumë kohë më parë," tha ish-ambasadori në Gjermani. "Brenda strukturës së politikës së jashtme së Europës, ka një reflektim të brendshëm për të thënë: 'A e shkaktuam këtë luftë vetë? A ishim shumë pranë Rusisë?'"
Grenelli gjithashtu lavdëroi Trump-in për aftësinë e tij për të punuar shpejt në disa çështje politike kur u pyet nga një gazetar.
"Më pëlqen fakti që Donald Trump dhe do të thosha JD Vance e bëjnë gjithçka të thjeshtë, duke u përqendruar te politika e zakonshme dhe e arsyeshme që prek njerëzit çdo ditë," tha ai. "Pra, mendoj se është emocionuese të kemi një lider me ide. Por nëse ke punuar mjaftueshëm gjatë me presidentin Trump, e di që duhet të mbash ritmin dhe të lexosh, sepse shfaqen gjithmonë ide të reja." / Washington Examiner - Syri.net
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
BBC: Gruaja franceze e mbajtur peng nga burri i saj për 12 vjet, shpëtohet në Pakistan
Franca konfirmon rastin e parë të Ebolës, mjeku i infektuar në Kongo futet në izolim
Irani rihap pjesën perëndimore të hapësirës ajrore të vendit