Oliver Kahn ka kritikuar ashpër sjelljen e lojtarëve të Real Madridit pas eliminimit dramatik nga UEFA Champions League ndaj Bayern Munich.

Sipas legjendës gjermane, momentet pas ndeshjes në “Allianz Arena” u shoqëruan me tension të lartë, ku lojtarët e Real Madridit rrethuan arbitrin Slavko Vinčić dhe protestuan ashpër ndaj vendimeve të tij.

Situata u përkeqësua pas kartonit të kuq të Eduardo Camavinga-s, që ndezi reagime të forta brenda skuadrës spanjolle. Më pas, edhe Arda Güler u ndëshkua me karton të kuq pas përfundimit të ndeshjes, ndërsa Dani Carvajal dhe lojtarë të tjerë u përfshinë gjithashtu në protesta të zëshme.

Kahn u shpreh se kjo sjellje e tejkalon çdo kufi të pranueshëm në futbollin modern. “Duhet të merren masa. Nuk mund të vazhdojnë të shpëtojnë gjithmonë nga situata të tilla. Kur gjërat nuk shkojnë sipas tyre, gjithçka përfundon në kaos,” deklaroi ai.

Ai shtoi gjithashtu se ky është një problem i përsëritur: “Sillen sikur çdo vendim i saktë duhet të jetë në favor të tyre. E kemi parë edhe sezonin e kaluar dhe po e shohim sërish. Kjo është e papranueshme.”

Ish-portieri gjerman shkoi edhe më tej, duke komentuar historinë e klubit në kompeticion: “Sinqerisht, kjo tregon shumë për mënyrën se si kanë fituar 15 tituj të Champions League,” u shpreh Kahn.

Deklaratat e tij kanë ndezur diskutime të reja rreth sjelljes së lojtarëve dhe reagimeve ndaj arbitrave në futbollin elitar, ndërsa nga ana tjetër Bayern Munich feston kualifikimin në gjysmëfinale.