Dy javë pas largimit nga Federata Italiane e Futbollit, Gianluigi Buffon është rikthyer të shkruajë në Instagram, duke i dedikuar një mesazh prekës mikut dhe ish-bashkëlojtarit të tij, Alexander Manninger, i cili humbi jetën pas një aksidenti tragjik në Salzburg.

“I dashur Alex,

çdo fjalë është e tepërt. Çdo lot do të ishte vetëm një tjetër për humbjen e një miku dhe të një personi që e kam admiruar gjithmonë.

Ti zgjodhe të mbetesh i pavarur nga rutina e botës së futbollit, duke kërkuar lumturinë tënde në gjërat e thjeshta: një jetë e shëndetshme në pyll, peshkimi, natyra, familja. Ky ishte besimi yt.

Në një botë shpesh të përkulur dhe të nënshtruar, që ndjek shtypjen, karrierizmin dhe fitimet e lehta, ti gjithmonë ke mbrojtur lirinë tënde, duke qëndruar drejt, me krenarinë e dikujt që e di çfarë kërkon.

Kishe forcën të largoheshe nga e gjithë kjo dhe të na shikoje me atë buzëqeshjen tënde të qetë, sikur thoshe: “jeni të gjithë të çmendur, nuk do të më keni kurrë.”

Shpresoj, madje jam i sigurt, që nga lart do të vazhdosh të udhëzosh fëmijët e tu të mrekullueshëm dhe bashkëshorten tënde të re.

Prehu në paqe.

Gigi”