Janë publikuar formacionet zyrtare të ndeshjes Como – Inter, e vlefshme për javën e 32-të të Serie A.

Interi vjen në këtë sfidë me objektivin për t’u shkëputur në krye të tabelës, sidomos pas rezultateve të rivalëve, ndërsa një fitore në “Sinigaglia” do ta çonte skuadrën e Cristian Chivu deri në +9 pikë ndaj ndjekësve.

Como me surpriza në formacion

Skuadra e Cesc Fàbregas rreshtohet me skemën 4-2-3-1. Në sulm është Anastasios Douvikas si qendërsulmues, ndërsa Assane Diao aktivizohet në krahun e djathtë, jo si “9 fals”. Në krahun tjetër luan Baturina, ndërsa Nico Paz vendoset pas sulmuesit. Në mbrojtje, Kempf dhe Diego Carlos përbëjnë qendrën, të mbështetur nga Van der Brempt dhe Valle në krahë.

Inter pa Lautaro, por me dyshen Pio–Thuram

Inter vjen me mungesën e madhe të Lautaro Martínezit të dëmtuar, por trajneri Chivu ka zgjedhur një skemë sulmuese me dyshen Francesco Pio Esposito dhe Marcus Thuram.

Në mesfushë rreshtohen Barella, Çalhanoglu dhe Zielinski, ndërsa në krahë aktivizohen Dimarco dhe Dumfries. Në mbrojtje, Acerbi merr vendin e De Vrij, i shoqëruar nga Akanji dhe Bastoni.

Një ndeshje që pritet me interes të madh, ku Interi kërkon të bëjë hapin e madh drejt titullit, ndërsa Como synon të surprizojë në shtëpi dhe të mbajë gjallë ëndrrën evropiane.