Në javën e 32-të të Serie A, Napoli u ndal në një barazim 1-1 ndaj Parmës, duke humbur një mundësi të artë për të mbajtur presionin mbi Interin në garën për titullin.

Ndeshja në stadiumin ‘Tardini’ nisi në mënyrën më të keqe për skuadrën e drejtuar nga Antonio Conte. Vetëm pas 35 sekondash lojë, Gabriel Strefezza kaloi vendasit në avantazh me një goditje të saktë që përfundoi në rrjetë, pas një aksioni të shpejtë ku u dallua edhe asistimi ajror i Elphege.

Parma u shfaq e rrezikshme në kundërsulme gjatë pjesës së parë, duke vënë në vështirësi Napolin, që hasi probleme për të imponuar lojën e tij. Në një rast vendimtar, portieri Vanja Milinković-Savić ndërhyri me zgjuarsi duke dalë deri në mesfushë për të ndalur një aksion të rrezikshëm.

Në pjesën e dytë reagimi i Napolit erdhi falë Scott McTominay, i cili në minutën e 60-të barazoi rezultatin me një goditje nga distanca pas një asistimi nga Hojlund, duke u konfirmuar edhe një herë si njeriu vendimtar për skuadrën “e kaltër”.

Në minutën e 72-të, trajneri Cuesta i dha debutimin në Serie A talentit polak, Daniel Mikolajewski (i lindur në vitin 2006), ndërsa rezultati mbeti i pandryshuar deri në fund.

Ky barazim i jep fund serisë prej pesë fitoresh radhazi për Napolin, që tani ngjitet në kuotën e 66 pikëve, ndërsa Parma shkon në 36 pikë. Ndërkohë, Interi ka mundësinë të shkëputet në +9 pikë nëse arrin të mposhtë Como-n në sfidën e radhës.