Juventusi u ngjit në katërshen e parë të Serisë A pasi mposhti Atalantën me rezultatin 0-1 në “New Balance Arena”, duke e çuar në gjashtë ndeshje serinë pa humbje në kampionat, falë golit të Zheremi Boga në minutën e 48-të.

Në fund, kjo ishte një mbrëmje zhgënjyese për Atalantën, pasi mungesa e konkretizimit në momentet vendimtare rezultoi fatale për ta.

Edhe pse nuk ishin në formën e tyre më të mirë, bardhezinjtë arritën të ruajnë avantazhin dhe të marrin tre pikë shumë të rëndësishme, duke i ushtruar presion Milanit të vendit të tretë, teksa tashmë diferenca është vetëm 3 pikë.

Bardhezinjtë do të përpiqen të vazhdojnë formën pozitive javën e ardhshme kur të presin Bolonjën, me një vend në Champions League që mbetet objektiv i madh.

Nga ana tjetër, Atalanta mbetet në vendin e shtatë dhe do të synojë rikthimin te fitorja kur të udhëtojë drejt Romës në javën e 33-të.