Milani ka pësuar dy humbje radhazi në Serie A për herë të parë që nga marsi i vitit 2025, pas disfatës së rëndë 3-0 ndaj Udineses në “San Siro”.

Skuadra e Massimiliano Allegrit hyri në ndeshje me synimin për të rikuperuar terren pas rënies së formës që i ka larguar nga gara për titullin, duke u fokusuar tashmë në sigurimin e një vendi në katërshen e parë dhe kualifikimin në UEFA Champions League.

Milani kishte më shumë posedim në minutat e para, por pa rrezik real në zonën kundërshtare.

Rafael Leão provoi nga distanca, por gjuajtja e tij përfundoi mbi traversë.

Nga ana tjetër, Udinese ishte shumë më efikase në kundërsulme dhe kaloi në avantazh në minutën e 27-të.

Nicolò Zaniolo depërtoi në zonë dhe asistoi për Arthur Atta, goditja e të cilit devijoi dhe përfundoi në rrjetë, duke befasuar portierin Mike Maignan.

Christian Pulisic provoi të kthente Milanin në lojë me një aksion individual, por goditja e tij kaloi shumë pranë shtyllës. Megjithatë, goditja e dytë erdhi për miqtë, kur Jurgen Ekkelenkamp shënoi me kokë pas një krosimi të Zaniolos për 2–0.

Në pjesën e dytë, Milani u hodh në sulm dhe krijoi disa raste të mira.

Luka Modrić u ndal dy herë nga portieri Maduka Okoye, i cili më pas bëri edhe një pritje vendimtare ndaj Alexis Saelemaekers.

Rastet e humbura nga Niclas Füllkrug dhe Strahinja Pavlović me kokë e lanë Milanin pa gol, ndërsa Udinese vulosi fitoren me golin e tretë, sërish me Arthur Atta, duke përfituar nga një tjetër aksion i shpejtë dhe efikas.

Kjo humbje e thellë e çon Milanin në një moment delikat: katër humbje në shtatë ndeshjet e fundit në kampionat, pas një serie prej 24 ndeshjesh pa disfatë (15 fitore, 9 barazime).

Shpresat për titull praktikisht janë shuar, ndërsa tashmë rrezikohet edhe lufta për vendet e Champions League në javët e fundit të sezonit.

Në anën tjetër, kjo fitore e rëndësishme e ngjit Udinese në vendin e 10-të dhe i jep fund një serie prej katër humbjesh radhazi ndaj Milanit në përballjet direkte.