Një vendim që pritet të shkaktojë debat të gjerë është marrë nga Komiteti Olimpik Ndërkombëtar (IOC), i cili ka miratuar një politikë të re për pjesëmarrjen në kategorinë e femrave në Lojërat Olimpike. Sipas kësaj rregulloreje, pjesëmarrja në garat për femra do të jetë e kufizuar vetëm për gratë biologjike, në përputhje me një linjë të ngjashme me qëndrimin e Donald Trump mbi sportin femëror, në prag të Olimpiadës së Los Anxhelosit 2028.

Sipas IOC, pranueshmëria në kategorinë e femrave do të përcaktohet fillimisht përmes testimit të gjenit SRY, i cili lidhet me zhvillimin seksual mashkullor. Ky test mund të realizohet përmes pështymës, tamponit ose analizës së gjakut dhe konsiderohet pak invaziv dhe i besueshëm. Prania e këtij gjeni, sipas organizmit, është një tregues i qëndrueshëm gjatë gjithë jetës për zhvillimin mashkullor.

Atletet që rezultojnë negative në testin për gjenin SRY do të konsiderohen automatikisht të pranueshme për të konkurruar në kategorinë e femrave dhe ky test do të kryhet vetëm një herë gjatë jetës, përveç rasteve të dyshuara për gabime. Nga ana tjetër, atletet me rezultat pozitiv nuk do të lejohen të marrin pjesë në këtë kategori, me përjashtim të rasteve shumë të rralla të disa çrregullimeve të zhvillimit seksual, si sindroma e pandjeshmërisë së plotë ndaj androgjeneve.

IOC thekson se atletët me test pozitiv SRY, përfshirë atletët transgjinorë XY, do të mund të konkurrojnë në kategori të tjera, si ajo mashkullore, kategoritë e përziera apo garat që nuk ndahen sipas gjinisë.

Presidentja e IOC, Kirsty Coventry, deklaroi: “Si ish-atlete, besoj fort në të drejtën e çdo sportisti për të garuar në kushte të drejta. Politika jonë bazohet në të dhëna shkencore dhe është hartuar nga ekspertë mjekësorë. Në Lojërat Olimpike, edhe detajet më të vogla mund të bëjnë diferencën mes fitores dhe humbjes. Prandaj, nuk do të ishte e drejtë që meshkujt biologjikë të garonin në kategorinë e femrave. Në disa sporte, kjo mund të jetë edhe e rrezikshme”.

Ajo shtoi se çdo atlet duhet të trajtohet me dinjitet dhe respekt, ndërsa procesi i testimit do të shoqërohet me mbështetje psikologjike dhe këshillim mjekësor të specializuar.