Një natë spektakolare në NBA solli emocione dhe rezultate të rëndësishme në të dy konferencat. Detroit Pistons arritën një fitore të madhe 113-110 ndaj Los Angeles Lakers, në një duel të fortë mes skuadrave pretendente. Protagonist për vendasit ishte Cade Cunningham me 30 pikë, ndërsa 32 pikët e Luka Dončić nuk mjaftuan për kalifornianët.

Vazhdon formën fantastike Oklahoma City Thunder, që regjistruan fitoren e dhjetë radhazi duke mundur 123-103 Philadelphia 76ers në transfertë. Më i dalluari ishte Shai Gilgeous-Alexander me 22 pikë. Fitore bindëse arritën edhe San Antonio Spurs, që mposhtën 136-111 Miami Heat, me një paraqitje dominante nga Victor Wembanyama (26 pikë e 15 rebound).

Spektakël ofroi edhe sfida mes Golden State Warriors dhe Dallas Mavericks, ku Warriors fituan 137-131 pas kohës shtesë, falë kontributit të madh të stolit me 61 pikë.

Fitore të rëndësishme morën edhe Chicago Bulls, që triumfuan 132-124 ndaj Houston Rockets me shtatë lojtarë me shifra të dyfishta, si dhe Los Angeles Clippers, që shkatërruan 129-96 Milwaukee Bucks, me Kawhi Leonard autor të 28 pikëve.

Rezultate të tjera: Indiana fitoi 128-126 ndaj Orlandos, Atlanta dominoi 146-107 Memphis, Toronto mposhti 143-127 Utah Jazz, ndërsa Portland kaloi lehtësisht 134-99 Brooklyn.