Liverpooli ka bërë një hulumtim për të kuptuar mundësinë e transferimit të Alessandro Bastonit nga Interi përpara merkatos së verës, raportohet nga Spanja.

Interi duket i hapur për të shitur 26-vjeçarin këtë verë, pavarësisht se kontrata e tij skadon në 2028 dhe planet e mëparshme ishin ta lidhnin për një kohë më të gjatë me fanellën zikaltër. Vlera fillestare e Bastonit llogaritej rreth 70–80 milionë euro, por tani besohet se Interi mund ta lëshojë për afërsisht 50 milionë euro plus shtesa, shifër që ka tërhequr interesin e disa klubeve të elitës, sipas ‘La Gazzetta dello Sport’.

Barcelona ka qenë lider në garë dhe e shikon Bastonin si qendërmbrojtësin kryesor në krahun e majtë, me drejtuesin sportiv Deco dhe hierarkinë e klubit që e kanë vënë emrin e tij në krye të listës.

Sipas raportimeve të ‘Diario SPORT’, Liverpooli i ka bërë një pyetje zyrtare Interit për të mësuar kushtet e një marrëveshjeje të mundshme, duke kërkuar informacion mbi çmimin, mënyrën e pagesës dhe pritshmëritë e pagës së lojtarit.

‘The Reds’ e shohin Bastonin si pasardhësin afatgjatë të Virgil van Dijk në qendërmbrojtje, dhe nuk do të kishin nevojë të përfshinin lojtarë të tjerë në shkëmbim apo të prisnin largime të mëdha para se të bënin ofertë. Nga ana e Interit, bisedimet janë të hapura dhe klubi është i gatshëm të negociojë nëse ofertat afrohen me vlerësimin e reduktuar, duke ditur se një shitje e Bastonit mund të financojë disa nënshkrime të tjera të tyre.

Sipas mediave, kampi i Bastonit ka bërë të ditur se zgjedhja e parë mbetet Barcelona, por ai është i gatshëm të dëgjojë oferta të tjera nëse klubi spanjoll nuk arrin marrëveshje me Interin.