Polonia do të përballet me mungesa të rëndësishme në prag të sfidës kundër Shqipërisë më 26 mars në Varshavë, duke i dhënë një lajm pozitiv kuqezinjve para këtij dueli të rëndësishëm.

Pas problemeve që ka Shqipëria, edhe polakët nuk janë të plotë. Sulmuesi Adam Buksa ka pësuar një dëmtim në muskulin e pulpës dhe do të mungojë në këtë përballje.

Lojtari, i cili aktivizohet me Udinesen, pritet të rikthehet vetëm pas përfundimit të ndeshjeve të kombëtareve.

Edhe pse nuk është titullar i padiskutueshëm, Buksa ka një kontribut të rëndësishëm me 25 paraqitje për përfaqësuesen.

Një tjetër goditje për Poloninë është mungesa e portierit Łukasz Skorupski.

“Gardiani” i Bolognës u dëmtua në ndeshjen ndaj Sassuolos dhe, sipas raportimeve nga mediat polake, nuk do të jetë i gatshëm për sfidën ndaj Shqipërisë.

Në vend të tij pritet të aktivizohet Kamil Grabara, portieri i Wolfsburg, i cili do të marrë përgjegjësinë në një ndeshje delikate.

Këto mungesa mund të ndikojnë në balancën e Polonisë, ndërsa Shqipëria do të synojë të përfitojë maksimalisht për t’u kualifikuar në “Play-off”-in e Botërorit.