Serie A mbylli javën e 29-të me një ndeshje shumë të rëndësishme për mbijetesën, ku Cremonese u mund 1-4 në shtëpi nga Fiorentina. Suksesi i thellë i skuadrës vjollcë i jep frymëmarrje të rëndësishme në luftën për qëndrimin në elitën e futbollit italian.

Mbrëmja në stadiumin ‘Zini’ nisi me një moment emocionues në kujtim të ish-kapitenit të Fiorentinës, Davide Astori. Më pas miqtë morën shpejt kontrollin e lojës dhe kaluan në avantazh në minutën e 25-të. Mbrojtësi Fabiano Parisi realizoi me një goditje diagonale që mposhti portierin Emil Audero, pas një devijimi të lehtë nga mbrojtja vendase.

Entuziazmi i Fiorentinës vazhdoi dhe në minutën e 31-të erdhi edhe goli i dytë. Pas një pasimi filtrues të Robin Gosens, sulmuesi Roberto Piccoli i shpëtoi mbrojtjes së Cremoneses dhe me një prekje elegante e dërgoi topin në rrjetë për 2-0.

Goli më spektakolar i takimit erdhi menjëherë në fillim të pjesës së dytë. Në minutën e 49-të, braziliani Dodô realizoi një aksion individual të jashtëzakonshëm: përshkoi më shumë se gjysmën e fushës, shmangu disa kundërshtarë dhe e mbylli aksionin me një prekje të bukur për 3-0.

Megjithatë vendasit nuk u dorëzuan dhe në minutën e 57-të David Okereke ngushtoi diferencën në 3-1, pas një asistimi nga Federico Ceccherini. Cremonese tentoi të rikthehej në lojë, por Fiorentina e mbylli përfundimisht ndeshjen në minutën e 70-të. Albert Gudmundsson, i shërbyer me thembër nga Piccoli, realizoi golin e katërt me një goditje të saktë me të djathtën.

Me këtë fitore të rëndësishme, Fiorentina ngjitet në kuotën e 28 pikëve, duke u larguar në +4 nga zona e rënies nga kategoria. Ndërkohë, Cremonese mbetet me 24 pikë në vendin e tretë nga fundi të renditjes, vetëm tri pikë larg zonës së shpëtimit.