Ferrari dominon testet dimërore në Bahrein dhe, ndërsa Charles Leclerc dhe drejtori i ekipit Frederic Vasseur kërkuan qetësi brenda skuadrës, Lewis Hamilton ka ngjallur entuziazëm tek tifozët e “kokëkuqve”. Piloti britanik, i cili postoi në Instagram ku ka 42 milionë ndjekës, e përshkroi atmosferën në garë si të jashtëzakonshme dhe i siguroi fansat për sezonin e ardhshëm.

“Testimet kanë mbaruar. Të shohësh një ekip që jep gjithçka për të ndërtuar një makinë është frymëzuese. Për mua, kjo është pjesa më interesante e kësaj pune,” shkroi Hamilton. Ai shtoi se puna me makinën ndërtohet nga e para, ridizajnohet shumë herë dhe vetëm disa kanë mundësinë ta testojnë atë, duke e bërë eksperiencën të paharrueshme. “Dua të falënderoj shumë të gjithë në ekipin e fabrikës për punën e tyre të palodhur për të arritur në këtë pikë! Jam vërtet mirënjohës,” tha ai.

Hamilton nuk la pa theksuar as humorin e tij dhe motivimin për sezonin e ri: “E dua absolutisht këtë punë, më pëlqen të punoj me ekipin tim dhe të ngas për tifozët. Jam jashtëzakonisht me fat që bëj atë që bëj dhe jam i emocionuar për sezonin që vjen.”

Piloti britanik përfundoi me një mesazh optimist: “Ndihem i rifreskuar dhe gati për të vazhduar përsëri. Nuk do të shkoj askund, kështu që qëndroni me mua. Për një moment, harrova kush isha, por falë jush dhe mbështetjes suaj, nuk do ta shihni më atë qëndrim. E di çfarë duhet të bëj. Do të jetë një sezon i jashtëzakonshëm. Dhashë gjithçka për të qenë këtu sot.”

Me këtë entuziazëm, Hamilton duket gati të nisë një kapitull të ri në Formula 1, duke rritur pritshmëritë e tifozëve të Ferrari për një sezon të jashtëzakonshëm.