Spekulimet për një largim të mundshëm të kapitenit anglez Harry Kane drejt Barcelonës janë mohuar fuqishëm. Gazetari Florian Plettenberg bëri të qartë se një transferim veror te gjigantët katalanas nuk është planifikuar dhe nuk duket realist në këtë moment.

Kane, i cili ka ardhur te Bayerni nga Tottenhami, ka folur publikisht për këto thashetheme, duke theksuar se ndihet shumë mirë në Gjermani, duke mohuar çdo kontakt të fshehtë me Barcelonën. “Nuk kam dëgjuar asgjë për këtë. As babai, as vëllai nuk më kanë thënë asgjë. Jam shumë i lumtur këtu,” deklaroi Kane.

Bayerni po planifikon ta mbajë sulmuesin si pjesë kyçe të projektit. Hierarkia e klubit ka nisur bisedimet për rinovimin e kontratës, që mund ta mbajë atë në “Allianz Arena” deri në vitin 2028 ose 2029. Për bavarezët, ruajtja e Kane nuk lidhet vetëm me golat, por edhe me cilësitë e tij udhëheqëse dhe përvojën në ndeshje me presion të lartë.

Ndërkohë, Barcelona ka qenë e lidhur me disa sulmues të profilit të lartë për shkak të pasigurisë mbi të ardhmen e Robert Lewandowski-t, por aktualisht duket se Kane do të qëndrojë në Mynih, ku ka arritur të bëhet pika qendrore e sulmit bavarez.