Trajneri i Romës, Jose Mourinho, ka refuzuar ofertën për të marrë kombëtaren e Brazilit, raportojnë mediat italiane, duke theksuar se ai është plotësisht i fokusuar në punën që ka nisur në Romë.

Brazilianët janë aktualisht pa trajner pasi Tite dha dorëheqjen pas eliminimit nga Kroacia në Botërorin e Katarit dhe drejtuesit e Federatës së Futbollit kontaktuan me Mourinhon me dëshirën për të arritur bashkëpunimin dhe për të qenë ai trajner i kësaj skuadre në e ardhmja.

Nga ana tjetër, Mourinho e refuzoi ofertën e brazilianëve sepse dëshiron të qëndrojë te Roma dhe ndonëse legjendari Ronaldo u përpoq ta bindte të ndryshonte vendimin e tij, në fund dështoi.

Mësohet se portugezi ka ripërsëritur qëndrimin e tij se dëshiron t'i përkushtohet plotësisht karrierës së tij në klub dhe se për momentin nuk është gati të jetë trajner i asnjë ekipi kombëtar. Gjithashtu, së fundmi ai ishte i lidhur me marrjen e drejtimit të kombëtares së Portugalisë, por ai e refuzoi edhe atë ofertë.

Mourinho erdhi te Roma në vitin 2021 dhe me këtë ekip fitoi UEFA Conference League sezonin e kaluar. Ai më parë ka drejtuar Porton, Interin, Chelsean, Realin, Manchester Unitedin dhe Tottenhamin.