Vlorë/ Vetëm një vit pas rehabilitimit, segmenti nacional Vllahina-Poçem paraqet probleme serioze

Ky është segmenti i rrugës nacionale që nis nga Vllahina drejt Poçemit dhe lidhet me aksin Levan–Tepelenë.

Vetëm një vit pas përfundimit të rehabilitimit të plotë, rruga ka pësuar rrëshqitje pranë fshatit Kocul.

Banorët e zonës vënë në pikëpyetje cilësinë e punimeve. Sipas tyre, duke qenë se në shumë pjesë terreni është i rrëshqitshëm, segmenti duhej të ishte fortifikuar me masa mbrojtëse dhe barriera sigurie.

Ata thonë se në këtë aks është hedhur vetëm një shtresë e hollë asfalti dhe se punimet janë kryer pa standardet e duhura.

Për pasojë, rruga rrezikon që brenda pak vitesh të dalë jashtë funksionit.

Bëhet fjalë për një segment nacional prej 15 kilometrash, i ndërtuar si një nga korridoret lidhëse mes rrethit të Vlorës dhe Fierit.

Projekti është financuar nga qeveria shqiptare përmes Ministrisë së Infrastrukturës dhe Energjisë, me një fond prej mbi 4 milionë e 700 mijë euro, përfshirë TVSH-në.

Punimet janë realizuar nga kompania “Shkëlqimi 07”, ndërsa sot, vetëm një vit më pas, segmenti paraqet probleme serioze që ngrenë pikëpyetje mbi cilësinë e investimit.