Kampionia Amarda Dedej fiton medalje ari në karate, por bashkia Lushnje nuk e shpërblen

Ekipi i karatesë “Bijtë e Shqipes” nga Lushnja ka rikthyer sërish lavdi për sportin shqiptar, duke fituar medalje ari në kampionatin ballkanik të karatesë në Rijeka të Kroacisë. Amanda Dedej, përfaqësuese e skuadrës kombëtare, u shpall kampione në kategorinë 54 kg, duke ngritur flamurin shqiptar në këtë event ndërkombëtar.

Ekipi kombëtar përbëhej nga 8 sportistë, dy prej të cilëve nga Lushnja, ndërsa trajneri i ekipit “Bijtë e Shqipes”, Lirim Dedej, ka një eksperiencë 15-vjeçare në stërvitjen e mbi 90 sportistëve të karatesë, me dhjetëra medalje të fituara në nivel kombëtar dhe ndërkombëtar.

Trajneri Dedej thekson se sukseset e sportistëve janë rezultat i punës së përkushtuar të tij dhe bashkëpunimit të ngushtë me prindërit, pa mbështetje financiare nga bashkia Lushnje.

Ai nënvizon se ndërkohë që bashkia shpenzon mbi 600 milionë lekë të vjetra në vit për futbollin dhe sportet e tjera, rezultatet e ekipit të karatesë mbeten të padeklaruara dhe pa mbështetje financiare.

Përveç arritjes së medaljes së artë në kampionatin ballkanik, ekipi stërvit edhe kampionen kombëtare, ballkanike dhe botërore Amanda Dedej, e cila së shpejti synon medalje ari edhe në kampionatin europian.

Amanda Dedej shprehet se bashkia Lushnje i kishte premtuar një shpërblim prej 1000 eurosh për suksesin e saj ndërkombëtar, por deri tani kjo shumë nuk i është dhënë.

Ky sukses i ekipit “Bijtë e Shqipes” është një dëshmi e përkushtimit dhe talentit të sportistëve shqiptarë, të cilët vazhdojnë të ngrenë flamurin kombëtar në nivele ndërkombëtare, pavarësisht mungesës së mbështetjes lokale.