Pothuajse 10,000 vdekje nga koronavirusi u raportuan në dhjetor dhe shtrimet në spitale dhe njësitë e kujdesit intensiv u rritën, tha Drejtori i Përgjithshëm i Organizatës Botërore të Shëndetësisë Tedros Adhanom Ghebreyesus - me të dhëna që tregojnë se grumbullimet e festave nxitën rritjen e transmetimit të virusit.

"Edhe pse Covid-19 nuk është më një emergjencë globale shëndetësore, virusi ende qarkullon, ndryshon dhe vret", tha Tedros në një konferencë shtypi në Gjenevë të mërkurën.

Kishte një rritje prej 42 për qind të shtrimeve në spital dhe një rritje prej 62 për qind në shtrimet në terapi intensive nga muaji i kaluar. Tendencat bazohen në të dhënat e raportuara në OBSH nga më pak se 50 vende, kryesisht në Europë dhe Amerikë, tha Tedros, i cili vuri në dukje se kjo nuk është tabloja e plotë.

"Është e sigurt se ka rritje edhe në vende të tjera që nuk raportohen," tha ai. OBSH tha në një email të enjten se Rusia duket se po raporton shumicën e rasteve tek organizata shëndetësore, por theksoi se "shumë vende kanë reduktuar ose ndaluar raportimin, gjë që është pjesë e problemit".

Varianti JN.1 tani është më i raportuari globalisht, tha Tedros. Varianti i ri mbizotërues duket se është shumë më i aftë se ai i mëparshëm në infektimin e atyre që janë vaksinuar ose që kanë qenë të infektuar më parë, raportoi The Washington Post.

"Edhe pse 10,000 vdekje në muaj janë shumë më pak se kulmi i pandemisë, ky nivel i vdekjeve të parandalueshme nuk është i pranueshëm," tha Tedros ndërsa u kërkoi qeverive të vazhdojnë mbikëqyrjen e ngushtë dhe t'u ofrojnë njerëzve vaksina dhe trajtime.

Maria Van Kerkhove, drejtuese teknike në OBSH për Covid-19, tha në të njëjtën konferencë se infeksionet e tjera të frymëmarrjes në mbarë botën janë gjithashtu në rritje - tendenca që ajo pret të vazhdojnë në janar.

"Këtë vit, sidomos në hemisferën veriore, ne po shohim qarkullim të shumë llojeve të ndryshme të patogjenëve," tha ajo, duke përmendur gripin, rinovirusin dhe bakteret si pneumonia e mykoplazmës. Van Kerkhove tha se me hapjen e botës gjatë pandemisë së koronavirusit, "këto viruse, këto baktere, të cilat kalojnë në mënyrë efikase midis njerëzve përmes ajrit, përfitojnë".

OBSH po u bën thirrje njerëzve që të marrin masa paraprake, duke përfshirë testimin, vaksinimin, veshjen e maskave dhe sigurimin që zonat e brendshme të jenë të ajrosura mirë. "Vaksinat mund të mos ju ndalojnë të infektoheni, por po zvogëlojnë ndjeshëm mundësinë për t’u shtruar në spital ose për të vdekur", tha të mërkurën Michael Ryan, kreu i urgjencave në OBSH.

Nivelet e shtrimeve në spital nga koronavirusi po rriten në të gjithë Shtetet e Bashkuara, e cila është në grahmat e një tjetër rritjeje të Covid-it pasi njerëzit rifillojnë punën dhe shkollën pas pushimeve. CDC rekomandon marrjen e një vaksine të përditësuar të koronavirusit për të rritur mbrojtjen kundër JN.1.

Këtë javë në Spanjë, maskat u bënë të detyrueshme në spitale dhe objekte shëndetësore pasi vendi përjeton një rritje të rasteve të gripit, koronavirusit dhe sëmundjeve të tjera të frymëmarrjes.