Sipas studimeve, qentë janë zgjedhur si një ndër qeniet që mund të dallojnë se kur një njeri është me koronavirus, apo jo, vetëm përmes erës së djersës.

‘Qentë mund të zbulojnë erën e djersës në një person që e mbart tashmë COVID-19, midis një seri mostrash, me sukses 100%’, thonë studiuesit.

Trajnimi i qenve për zbulimin e COVID-19 po kryhet në Emiratet e Bashkuara Arabe, Kili, Argjentina, Brazili dhe Belgjika nga trajnerë specialistë të cilët janë trajnuar për të evidentuar koronavirusin.

Në Emiratet e Bashkuara Arabe, qentë gjurmues gjenden tashmë në aeroporte, duke ndihmuar në uljen e përhapjes së pandemisë.

Studiuesit kanë zbuluar se qentë e stërvitur mund të zbulojnë bartës të sëmundjes, edhe kur janë asimptomatikë dhe rezultati u verifikua më vonë nga testet molekulare, shkruajne mediat e huaja.

Mesatarisht, qentë kanë rreth 220 milion receptorë të aromës. Mostrat e djersës janë një përzierje komplekse e përbërjeve organike të paqëndrueshme.

Sipas ekspertëve, trajnimi i qenve për të zbuluar SARS-CoV-2 zgjat 6-8 javë, pasi qeni tashmë është trajnuar për të zbuluar substanca të caktuara dhe 3-6 muaj duhet të trajnohet një qen për të zbuluar COVID-19 tek njerëzit.

Ekspertët vlerësojnë se qentë mund të angazhohen në operacione në aeroporte, shtëpi pleqsh dhe hapësira publike pa rrezikun e infektimit të tyre ose transmetimit të infeksionit.

E pra kështu qentë na vërtetuan edhe një herë pse ata janë miqtë më të mirë të njeriut./ Panorama/