Demokratët e qarkut të Beratit janë nisur sot drejt protestës së organizuar nga Partia Demokratike në Tiranë, përpara Kryeministrisë. Protesta ka tërhequr jo vetëm mbështetësit e PD-së, por edhe qytetarë të paangazhuar politikisht, të cilët kanë vendosur të bashkohen për të shprehur pakënaqësinë ndaj qeverisë aktuale.

Kryetari i PD-së Berat, Kasion Hasimetaj, ka theksuar se është e domosdoshme që të gjithë qytetarët të bashkohen për të protestuar kundër qeverisë, e cila, sipas tij, ka shkaktuar rritje të papërmbajtshme të çmimeve, përfshirë çmimin e naftës që ka arritur nivele rekord. Ai ka shtuar se kjo protestë është një thirrje për një të ardhme më të mirë për fëmijët e Shqipërisë.

Nisja e demokratëve nga qyteti i Beratit është organizuar me kujdes nga struktura e degës së PD-së, duke grumbulluar protestuesit në dalje të qytetit, në Moravë. Ata janë nisur me mbi 85 automjete, ndërkohë që në rang qarku janë gjithsej mbi 140 automjete që do të bashkohen me protestën në Tiranë. Protestuesit janë nisur kryesisht me mjete private, duke ndjekur një formë organizimi të përdorur edhe në protestat e mëparshme.

Hasimetaj ka ftuar të gjithë qytetarët që ndihen të prekur nga politikën e qeverisë të bashkohen dhe të protestojnë për një Shqipëri më të drejtë dhe me mundësi më të mira për të ardhmen e fëmijëve.