Giovanni Kessler, ish-kreu i zyrës evropiane kundër mashtrimit, u dënua me një vit burg me kusht për trajtimin që i bëri një hetimi ku përfshihej  ish-Komisioneri i Shëndetësisë i BE, John Dalli.

Por Kessle ka një lidhje me Shqipërinë, pasi ishte ai që deklaroi se nuk kishte shkelje ligjore në blerjen e vilës për rezidencë të ish-Ambasadores së Bashkimit Europian në Tiranë, Romana Vlahutin. Vila në Lundër, pranë Tiranës, ishte blerë nga BE me trefishin e çmimit të tregut dhe Romana Vlahutin u akuzua se kishte abuzuar me detyrën.

Edhe pse pati eurodeputetë që ngritën zërin, kjo dosje u arkivua pikërisht nga Kessler dhe Romana Vlahutin i shpëtoi hetimit penal, pavarësisht se u shkarkua nga Komisioni Europian në fillim të vitit 2023 për shkelje të ndryshme.

Dënimi i ish-shefit të OLAF kërcënon të ndezë më shumë tensione mbi sistemin e drejtësisë të BE-së

Një shef evropian i zyrës kundër mashtrimit e përgjoi në mënyrë të paligjshme një komisioner evropian në kuadrin e një hetimi, tha të premten një gjykatës belg, një qortim paprecedentë ky i sistemit të drejtësisë së BE-së.

Giovanni Kessler, një ish-shef i Zyrës Europiane Kundër Mashtrimit (OLAF), i cili u largua në vitin 2017, u dënua me një vit burg me kusht për trajtimin që i bëri një hetimi ku përfshihej John Dalli, i cili ishte Komisioneri i Shëndetësisë i BE-së.

Komisioneri Dalli dha dorëheqjen në tetor 2012 mes akuzave se ndihmësi i tij i lartë kërkonte ryshfet nga industria e duhanit por Dalli e ka shpallur me zë të lartë pafajësinë e tij.

"Unë kam vepruar gjithmonë në mënyrë transparente dhe me qëllimin për të gjetur të vërtetën mbi akuzën, e cila ishte një akuzë shumë serioze," tha Kessler për Politico.

Ndërsa BE-ja përballet me pasojat e një skandali të ndryshëm ryshfeti që përfshin shtetin e Katarit, kthesa e fundit në të ashtuquajturin rasti “Dalli- gate” kërcënon të rindezë tensionet mbi një sistem të brendshëm të politizuar të zbatimit.

Ish-komisioneri Dalli kishte punuar për një rishkrim të Direktivës së BE-së për Produktet e Duhanit, kur ndihmësi i tij Silvio Zammit u akuzua se kishte kërkuar një ryshfet prej 60 milionë eurosh nga një kompani suedeze e duhanit për të anuluar një masë ndalimi të BE-së për snus, një lloj duhani pa tym.

Skandali rezultoi në rrëzimin e Dallit nga posti. Ndërsa ai u akuzua se nuk zbuloi disa takime me lobistët e duhanit, një raport i Zyrës Evropiane Kundër Mashtrimit (OLAF) mbi këtë çështje nuk gjeti asnjë lidhje të drejtpërdrejtë midis Dallit dhe kërkesës për ryshfet.

Mirëpo Kessler pretendoi se kishte "prova rrethanore të paqarta" që Dalli kishte dijeni për të.

Megjithatë, brenda pak vitesh, vetë shefi i zyrës Kessler ra nën vëzhgim dhe autoritetet belge filluan të shqyrtojnë pretendimet se hetimi mbi “Dalli-gate” ishte ekzekutuar dobët dhe i motivuar politikisht.

Pas vitesh vonese, Komisioni Evropian ra dakord në vitin 2016 për t’ia hequr imunitetin e Kessler. Kjo i hapi rrugën prokurorëve belgë për ta marrë në pyetje lidhur me pretendimet se ai regjistroi në mënyrë të fshehtë dëshmitarët e çështjes pa informuar të gjitha palët, një krim sipas ligjit belg.

"Është një mosmarrëveshje thjesht ligjore ... mbi një akt hetimor që, në shumë vende të Evropës, është padyshim legjitim," tha Kessler, duke shtuar se çështja u debatua edhe në Belgjikë pasi dy prokurorë të ndryshëm belgë kishin kërkuar që çështja të pushohej.

Në vendimin e saj të parë nga Politico, gjykata belge megjithatë tha se ishte "e shqetësuar" nga qëndrimi i Kessler, pasi ai "pohoi se nuk ishte në dijeni të ekzistencës së legjislacionit që rregullon regjistrimin e bisedave telefonike", edhe pse këto kufizime rrjedhin nga Konventa Evropiane për të Drejtat e Njeriut që ai nuk mund ta injoronte duke pasur parasysh rolin e tij si shef i OLAF.

“U deshën 11 vjet për të thyer përfundimisht sekretin e Komisionit Evropian, edhe pse vetëm në një pjesë të hetimit”, tha Dalli në një deklaratë pas gjykimit. "E vërteta do të mbizotërojë."/ar.sh/SYRI.NET