Brukseli iu përgjigj ashpër insistimit të qeverisë shqiptare për të mos hequr dorë nga amnistia fiskale.
Bashkimi Europian njoftoi se do të vendosë Shqipërinë në listën e vendeve nën monitorim për mosbashkëpunim fiskal.
Lidhur me këtë hap pas të Tiranës në rrugën e integrimit, ka reaguar kryetari i Partisë së Lirisë, Ilir Meta.
Ish-kreu i shtetit shkruan në një postim në rrjetet sociale se vendi ndodhej prej vitesh nën monitorimin e pastrimit të parave, tashmë përfshihemi dhe në listen e vendeve me regjim të dyshimtë fiskal.
Meta akuzoi kryeministrin Edi Rama se po e kthen Shqipërinë në parajsë fiskale të krimit të organizuar nëpërmjet miratimit të një sërë ligjeve që kanë vetëm për qëllim futjen e parasë së pisët në çdo sektor të ekonomisë.
Reagimi i Metës
Vendimi i Bashkimit Europian për të rikthyer Shqipërinë në listën e vendeve në monitorim për çështje fiskale është një tjetër goditje shumë e rëndë për Edi Ramën dhe Qeverinë e tij të korruptuar, të aferave dhe skandaleve të panumërta financiare. Ndërkohë që Shqipëria ndodhet prej disa vitesh në listën e vendeve nën monitorim për pastrimin e parave, tashmë përfshihemi dhe në listen e vendeve me regjim të dyshimtë fiskal.
Edi Rama e ka zhytur vendin në paligjshmëri totale duke e shndërruar Shqipërinë në parajsën fiskale të krimit të organizuar vendas e ndërkombëtar nëpërmjet miratimit të një sërë ligjeve që kanë vetëm për qëllim futjen e parasë së pisët në çdo sektor të ekonomisë. Edhe tentativa skandaloze e Edi Ramës për pastrimin e parave të korrupsionit dhe krimit të organizuar nëpërmjet "Amnistisë Fiskale" është një nga arsyet kryesore të këtij vendimi të BE, që dekurajon rëndë afrimin e investimeve të huaja serioze në Shqipëri.
Në dhjetë vite, Kryeministri në largim dështoi totalisht në konsolidimin e një administrate tatimore moderne dhe minoi me qëllim përpjekjet kundër krimit dhe korrupsionit duke dobësuar efikasitetin e mekanizmave shtetërore, që luftojnë paranë e pisët. Vetëm largimi i Edi Ramës e rikthen ekonominë në shinat e ligjit dhe sjell investime të huaja dhe vendase serioze duke siguruar kështu një zhvillim të qëndrueshëm dhe afatgjatë të ekonomisë, që prodhon mirëqenie për qytetarët dhe ndalon shpopullimin dramatik!
© SYRI.net