Teksa parlamenti është përfshirë nga debate të ashpra ku kryefjalë janë përjashtimet e deputetëve të PD-së nga seancat plenare, me arsyetimin se bllokojnë foltoren dhe thyejnë rregullat, demokratët janë kundërpërgjigjur me një video të nxjerrë nga arkiva.

Pas përjashtimit të sotëm të kryedemokratit Sali Berisha nga Kuvendi dhe deputetëve Edi Paloka, Belind Këlliçi dhe Flamur Noka, ky i fundit ka publikuar një video kur PS-ja në opozitë, gjatë vitit 2006, bënte të njëjtat sjellje sikur demokratët sot. Noka pohoi se ndonëse PS-ja kur ishte në opozitë bënte të njëjtën gjë, asokohe nuk i përjashtonte njeri nga Kuvendi.

Në pamjet nga Kuvendi i asaj kohe shihet kaosi i krijuar në sallë, ku deputetë të PS-së i bien bilbilit, mes tyre Ndriçim Hysa, ndërkohë që ngrihen dhe ‘zaptojnë’ foltoren. ‘Vota e fshehtë, vota e fshehtë’, dëgjohet teksa brohorasin në një zë deputetët socialist ku asokohe kreu i grupit parlamentar ishte Ben Blushi, ndërsa kryeparlamentarja Jozefina Topalli mundohej të vinte qetësi.

‘Jepe fjalën’, bënin thirrje me megafon deputetët socialistë teksa i drejtoheshin Topallit, ndërsa Arta Dade i drejtohej duke u hakërryer kryeparlamentares, madje përdorte dhe mikrofonin e saj.