Mambat e Zeza janë njësia e afrikanojugore kundër gjuetisë së paligjshme që përbëhet vetëm nga femra. Shikoni se si ato përballen me gjuetarët e kafshëve të egra, pa armë. Shumica e njësive kundër gjuetisë së paligjshme në Afrikë ndjekin një model të njohur: rojtarë meshkuj të armatosur me pushkë patrullojnë pyjet për të kapur ata që shpresojnë të kapin kafshë të mëdha për tregtinë e paligjshme fitimprurëse të pjesëve të trupit të tyre. Një njësi që operon në Rezervatin Natyror Perëndimor të Olifantsit brenda Parkut Kombëtar Greater Kruger në Afrikën e Jugut është pak më ndryshe.

Mambat e Zeza, të quajtur prej gjarprit vdekjeprurës, është njësia e parë kundër gjuetisë së paligjshme vetëm me femra në Afrikën e Jugut. Që kur u krijuan në vitin 2013, ato kanë pasur një ndikim të rëndësishëm në ruajtjen e kafshëve të egra vendase. Duke hequr çarqet e kurthet, grupi pretendon se ka reduktuar ndjeshëm gjuetinë pa leje dhe ka eliminuar gjuetinë e rinocerontit brenda rezervës.

Avitja e tyre është e diskutueshme; rojtaret nuk mbajnë asnjë armë dhe në vend të kësaj bazohen në përforcimet e armatosura kur ndeshin në gjuetarë të armatosur. Rojtaret gjurmohen në kohë reale dhe operojnë qendrën e tyre të kontrollit të komandës. Ata janë të pajisura me gaz lotsjellës, pranga dhe radio dhe nuk përfshihen në prita.

Mambat e Zeza operojnë me turne, duke patrulluar rezervat, i cili është 20,000 hektarë (200 km2), dhe hapin sytë për gracka dhe për prova të inkursioneve përmes gardhit rrethues. Ato mbështeten në trajnimin intensiv dhe disiplinën ushtarake për të reaguar ndaj çdo lloj situate.

Disa mund ta shohin avitjen e paarmatosur të grupit si një rrezik real – gjuetarët me të cilët përballen zakonisht mbajnë armë. Por Cutie Mhlongo, një Mamba e Zezë që nga viti 2014, nuk është dakord. "Avantazhi ynë është se ata nuk na qëllojnë, sepse e dinë që ne nuk mbajmë armë," thotë ajo. Rojtaret rrallëherë pësojnë lëndime serioze nga kafshët apo gjuetarët.

Për shumë gra nga komunitetet lokale, mundësitë e punësimit janë të pakta. Të bëhesh një Mamba e Zezë ka një ndikim më të gjerë, duke fuqizuar pozitën shoqërore të grave dhe duke fituar pavarësinë ekonomike. Aftësia e Mambave të Zeza për të bërë një ndryshim për ruajtjen e kafshëve të egra vendase gjithashtu rrit të kuptuarit më të gjerë të çështjes. Miqtë e Mhlongo janë të impresionuar nga aftësia e saj për të parashikuar sjelljen e kafshëve dhe për të qëndruar të sigurta. Ata e shohin si një model dhe duan të regjistrohen.

"Shumica e njerëzve në vend besojnë se këto kafshë u përkasin të bardhëve," thotë Mhlongo. “Ne duam ta ndryshojmë këtë mënyrë të menduari, në mënyrë që të gjithë në komunitetin tonë ta dinë se kjo kafshë e egër na përket të gjithëve ne”.