Izmir Sakica e Samuel Troshani marrin pafajësi për armët. Dënohen vetëm për prishje të qetësisë publike

Nga Elton Qyno Syri.net/

Gjykata e Shkodrës ka vendosur të dënojë 3 persona që sipas policisë së Shkodrës, janë lidhje shoqërore e drejtuesve të grupit “Bajri” në Shkodër.

Sipas vendimit të gjykatës, Izmir Sakica është dënuar me 2 vjet e 8 muaj burgim për dy akuzat si “Prishje e qetësisë publike” kryer në bashkëpunim dhe “Mbajtjes pa lejë të armëve sportive tip automatik” dhe një pistoletë “Glock”, me mbishkrimin “Made in China”.

Ndërsa për akuzën e “Mbajtjes pa lejë të armëve të zjarrit dhe municionit”, Izmir Sakica, është shpallur i pafajshëm.

Njëkohësisht, Gjykata e Shkodrës vendosi të dënojë me 1 vit e 4 muaj burgim, shokun e Izmir Sakicës, Samuel Troshanin.

Troshani u deklarua fajtor për akuzën e “Prishjes së qetësisë publike” kryer në bashkëpunim. Kurse për “Mbajtjes pa lejë të armëve dhe municionit” u deklarua i pafajshëm.

Me 1 vit e 4 muaj burgim gjykata e Shkodrës dënoi dhe Arlind Kajoshin, i cili u deklarua fajtor për akuzën e “Prishjes së qetësisë publike”.Sipas vendimit të gjykatës, dy armë sportive tip pistoletë “Glock” dhe një automatik kallashnikov sportiv, gjykata urdhëroi të kalojnë në favor të shtetit.

Izmir Sakica dhe Samuel Troshani, u vetëdorëzuan vullnetarisht në policinë e Shkodrës, pas një konflikti që patën me shtetasin Alban Bruçi dhe babain e këtij të fundit, Vladimir Bruçi.

Ndërkohë pavarësisht këtij vendimi të dhënë nga gjykata e Shkodrës, Izmir Sakica dhe Samuel Troshani, do vijojnë të qëndrojnë në burg, pasi ndaj tyre ka vendosur SPAK, masën e sigurisë “arrest në burg” për akuzën e “Sigurimit të kushteve për të kryer vrasje” dhe “Mbajtje pa lejë të armëve”, vepra penale këto që janë kryer në kuadër të “Grupit të strukturuar kriminal”.

Sipas SPAK-ut, Sakica, Troshani dhe Leka bashkë me disa persona të tjerë, ende të paidentifikuar, të armatosur dhe me makina të blinduara janë nisur drejt Bushatit për të vrarë anëtarët e familjes Prendi.

Por sapo grupi i armatosur shkoi në Bushat, Aleksandër Prendi i ka pikasur duke qëlluar mbi makinat e blinduara. Sipas prokurorisë, aty ka pasur shkëmbim zjarri pasi janë konstatuar gëzhoja të ndryshme në vendin e ngjarjes.