Juria në Spanjë e shpall fajtor: Florian Rama vrau me paramendim 24-vjeçarin

Një juri popullore në Spanjë e shpalli fajtor shqiptarin Florian Rama për vrasjen e një 24-vjeçari në vitin 2019

Nga Victor Mendez, DIARIO DE PONTEVEDRA

Juria e ka shpallur fajtor shqiptarin Florian Rama për vrasjen me paramendim të Soufian Mrahës, një i ri 24-vjeçar që u vra me thikë në qershor të vitit 2019 para një lokali nate në Salceda de Caselas.

Pas diskutimeve që nisën të enjten, anëtarët e jurisë morën vendimin unanimisht, siç u bë e ditur në mesditën e së premtes.

Juria e konsideroi të provuar se Rama e goditi Soufian Mrahën tri herë me thikë në trup me qëllim për t’i shkaktuar vdekjen dhe se i riu humbi jetën si pasojë e plagëve.

Provat kundër Florian Ramës

Vështirësitë e jurisë për të dhënë vendimin lidhen me faktin se krimi u krye pa dëshmitarë që mund ta identifikonin pa dyshim autorin.

Prova kryesore, përveç një fotografie të paqartë të publikuar më herët nga Garda Civile, ishin gjurmët e ADN-së së të akuzuarit në vendin ku ndodhi goditja me thikë. Kjo provë, sipas vlerësimeve, konsiderohet më shumë një indicie që e lidh me ngjarjen, por jo një provë përfundimtare.

Kësaj i shtohet edhe kalimi i kohës dhe fakti që i pandehuri qëndroi për vite me radhë jashtë vendit, derisa u arrestua në Mbretërinë e Bashkuar.

Të gjitha këto rrethana e bënë të vështirë vendimmarrjen e jurisë. Edhe pse anëtarët e saj morën dosjen e verdiktit që në mëngjesin e së enjtes, ata nuk arritën një vendim atë ditë, duke e shpallur përfundimisht vetëm të premten.