Një ngjarje e rëndë është regjistruar ditën e djeshme në qytetin të Durrësit, ku një 15-vjeçar është plagosur me thikë gjatë një konflikti mes të miturve. Policia ka arrestuar autorin e dyshuar, një 14-vjeçar, si dhe ka sekuestruar armën e ftohtë të përdorur në sulm.

Sipas njoftimit të policisë, shërbimet e Komisariatit të Policisë Durrës organizuan menjëherë veprimet hetimore për identifikimin dhe kapjen e autorit. Hetimet e kryera nga specialistët e Sektorit për Hetimin e Krimeve të Rënda, në bashkëpunim me oficerët e Komisariatit, treguan se gjatë një konflikti për motive të dobëta, i mituri M. K., 14 vjeç, dyshohet se goditi me thikë shtetasin E. B., 15 vjeç, duke i shkaktuar plagë të rënda.

I dëmtuari ndodhet në Spitalin Rajonal të Durrësit, nën kujdesin e mjekëve.

Pas disa orësh kërkimesh në zonë dhe në ambiente të ndryshme, policia arriti të lokalizojë dhe të arrestojë në flagrancë 14-vjeçarin M. K., i cili akuzohet për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”.

Materialet procedurale i janë referuar Prokurorisë së Durrësit, e cila po vijon hetimet për zbardhjen e plotë të ngjarjes.