'Arangea Bis – Oikos'/ Arrestohen 54 persona në operacionin kundër trafikut të drogës me përfshirje të strukturave shqiptare

Nga Alba Kepi

Ekzekutohet operacioni i koduar “Arangea Bis – Oikos”

Kapet 117 kg kokainë, zbardhet roli i strukturave shqiptare në trafikun ndërkombëtar të drogës.

Sot, më 14 korrik 2025, në Reggio Calabria, u zhvillua një nga operacionet më të fuqishme të viteve të fundit kundër trafikut ndërkombëtar të drogës. Operacioni i koduar “Arangea Bis – Oikos”, i koordinuar nga Drejtoria Antimafia dhe i mbështetur nga mbi 250 forca të rendit (Policia e Shtetit, Karabinierët dhe Garda e Financës), rezultoi në:

54 arrestime

Sekuestrimin e 117 kg kokainë, të fshehura në një automjet që sapo kishte dalë nga porti i Gioia Tauros

Kapjen e 483 mijë eurove cash

Bllokimin e pasurive mbi 1.5 milionë euro

Porti i Gioia Tauros u konfirmua edhe një herë si porta kryesore e drogës dhe nyje logjistike e mafias.

Hetimi zbuloi se porti i Gioia Tauros përdorej si pikë hyrëse strategjike për sasi të mëdha droge, të transportuara nga vendet e Amerikës Latine dhe Evropës Perëndimore. Kokaina fshihej në automjete të rënda dhe ishte e maskuar për të kaluar pa u zbuluar nga kontrolli doganor.

Rëndësia e këtij operacioni qëndron në zbardhjen e një strukture kriminale ndërkombëtare që qëndronte pas trafikut – një rrjet i organizuar me bazë në Itali, por me lidhje të forta në disa vende, përfshirë Shqipërinë.

Roli i strukturave shqiptare në rrjetin kriminal

Sipas hetuesve, grupi kriminal italian kishte lidhje të konsoliduara me struktura shqiptare, që luanin një rol të dyfishtë në skemën e trafikut: si furnizues të lëndës narkotike. Shqipëria përmendet si një nga vendet burimore të hashashit dhe marijuanës, e përfshirë në të njëjtën linjë me:

Ekuadorin (kokainë)

Spanjën, Gjermaninë, Belgjikën, Holandën

Shqiptarët ndihmonin në sigurimin e ngarkesave, shpesh në bashkëpunim me organizata të Amerikës Latine ose me kontaktet e tyre në portet evropiane. Grupi kriminal përdorte kanale të përbashkëta me shqiptarët për të transportuar drogën nga portet drejt magazinave dhe shpërndarjes në qytete si Reggio Calabria dhe Catania.

Komunikimi kryhej përmes aplikacioneve të kriptuara si SkyECC, të njohura për përdorim në qarqet e krimit të organizuar.

Rrjeti i zbuluar përfshinte edhe anëtarë të lidhur me klane historike të ‘ndranghetës, të cilët:

Siguronin mbrojtje territoriale dhe ndihmonin në shpërndarjen lokale të drogës

Merrnin pjesë në zhvatje mafioze, si rasti i një sipërmarrësi që ishte detyruar të paguante për një tender publik

Shqiptarët vepronin si partnerë operacionalë, të përfshirë në negociata, furnizim dhe kontroll terreni – një rol i konfirmuar nga hetimet dhe nga mënyra e organizimit të logjistikës.

Operacioni “Arangea Bis – Oikos” tregon qartë se shqiptarët janë pjesë integrale e rrjeteve të mëdha kriminale ndërkombëtare. Bashkëpunimi i tyre me ‘ndranghetën italiane nuk është i rastësishëm, por i strukturuar dhe i ndërtuar mbi besim, interes ekonomik dhe eksperiencë të përbashkët kriminale.