Një djalë 15-vjeçar shqiptar është paraqitur para disa ditësh në polici në stacionin Navile në Bolonja të Italisë, duke kërkuar ndihmë dhe duke i shpjeguar se babai e kishte braktisur në Itali pasi nuk kishte para, me premtimin se do të ketë “një jetë më të mirë”.

Adoleshenti, i cili nuk flet italisht, por që gjithsesi arriti të kërkonte ndihmë duke përdorur “Google Translate”, trokiti në dyert e policisë mbrëmjen e së martës 24 tetor , rreth orës 19:00, pasi kishte kaluar natën e mëparshme në një park të qytetit. Ai u shfaq i frikësuar nga përvoja që po përjetonte, por me shëndet të mirë. Në dëshminë e tij, ai tha për policinë se ishte braktisur nga babai i tij, një 46-vjeçar me origjinë shqiptare.

15-vjeçari kishte mbërritur në Itali pak ditë më parë, të enjten e 19 tetorit, me një fluturim nga Shqipëria dhe ishte nisur për në aeroportin Malpensa të Milanos, i shoqëruar nga babai i tij, i cili e bindi të largohej duke i premtuar kushte më të mira jetese se ato në të cilat ata ndodheshin në vendin e origjinës, ku megjithatë duket se është kthyer duke e lënë vetëm të miturin.

Karabinierët arritën ta qetësonin djalin, dhe më pas ia besuan ndihmësve të Emergjencave Sociale të Bolonjës që po kujdesen për adoleshentin. Babai i 15-vjeçarit, siç konfirmuan karabinierët për Fanpage.it , u bë i pagjurmueshëm pas kthimit në Shqipëri në 24 orët në vijim, dhe për pasojë u denoncua në Prokurori për braktisje të të miturve ose fëmijëve të paaftë dhe ndihma dhe nxitja e imigracionit të paligjshëm.